Kua eke te maraeo Te Puea ki tōna tau rima tekau

He rā hei whakakotahi mai i te hapori, nā runga i te karanga a ngā whānau o te marae o Te Puea hei maumaharatanga ki taua whāea rongonui a Te Puea Herangi.

Tua atu i tērā kua eke te marae ki tōna tau rima tekau e tū ana hei kawe i ngā moemoeā a ngā rangatira nā rātou nei i hanga.

Hei tā Te Kanga Skipper, “Ka maumahara hoki tātou kia rātou kua ngaro atu, pēnei i tā tātou tīpuna a Te Puea nei. Waimāria ko ahau tētahi o ngā tamariki i mau ki tana ringaringa ki te hīkoi haere ki roto i tēnei nohonga.”

E ai ki a Whati Ratu, “Tino pai te kite i ngā hunga taiohi, te hunga rangatahi, e haruru nei i tō tātou marae. Koina te painga, te whainga anō hoki mō tō tātou marae kia kawe ake i ēnei ngā kaupapa, hei whangai i te hunga taiohi kua tae mai i tēnei rā.”

He maha ngā piki he maha ngā heke i roto i ngā tau rima tekau ki muri. Heoi ko te āhua nei, ko te orangatonutanga o te marae i roto i ngā tau rima tekau kei mua, kua whakaritea kē mā wai hei kawe.

Ki tā Skipper, “He titiro anō tēnei mō tēnei ao hou, mō ngā āhuatanga i wawata pea rātou, o tātou pakeke. Ka tae mai te wā kei mua i a koutou, me tika tonu te mahi i ngā mahi, me tiaki koutou i ngā taonga tuku iho. Me kaha koutou ki te kōrero mō o mātou nei wawata mō te marae nei.”

Hei tā Ratu, “Kei roto i te kapu o wō tātou ringaringa, ngā rangatahi i tēnei wā, ngā āhuatanga o ngā kaumatua o nehe, ngā kaumatua onamata, otirā ngā kaumatua i ēnei rā, kei roto i ngō tātou ringaringa hei hiki, hei eke i ngā āhuatanga i mahue ake nei e rātou ki te ao tīroa.”

Nā reira kitea ai te hapori o te Piriti o Mangere, e harikoakoa ana, e tutakitaki ana, e tūhonohono ana i runga i te whakawhanaungatanga. Koinei tonu te moemoeā a rātou mā e tutukihia ana i tēnei rā.