Kua hā anō ai te pātaka reo pāpāho Māori ō mua

Te Kuru o te Marama Dewes

Kua whakarewaniga e Ngā Taonga i tōna pātaka kōrero hou arā ko Te Reo Pāpāho, he kohikohinga reo o te hunga pāpāho i te reo Māori ki te reo irirangi.

I kōrero a Te Kāea ki te kaiteki kōrero matua a Lawerence Wharerau e pā ana ki ngā kōrero nei me te wāriu i ēnei rā.

Kua hā anō ai te pātaka reo pāpāho Māori ō mua, arā, kua whakairia ki te ipurangi.

“Mena e hiahia ana koe ki te whakarongo ki te kounga me te mita a tērā, a tēra, he tino rauemi tērā mā te katoa, tāku nei,” te kōrero a Wharerau.

Ka hurahura ngā korero i ngā taumaha i amohia e te hunga nā rātau i pakanga kia whai wāhi ai te reo Māori ki ngā irirangi.

“Ko rātau i tino pakanga mō tō tāua reo ki runga i ngā ara tuku, nā rātau i whawhai i petihana ki te kāwanatanga, kia ū he tangata kōrero Māori ki runga i ngā ara tuku.”

Ko tā Te Reo Pāpāho he ketuketu i ngā kōrero reo irirangi Māori ō mua, tae rawa atu ki ngā tau whakarauora arā ngā tau whitu tekau.

“Nā ko taku wero ki ngā teihana Māori kia ū ki te reo noa, mā te hunga kāre i mōhiotia ki te kōrero i tō tāua reo he wero mā rātau ki te ū ki ērā āhuatanga o tō tāua reo.”

Hei tā Wharerau, he huarahi roa kei mua kia ū ki ngā wawata a rātau mā i para te huarahi ki te ao pāpāho reo Māori.

Kei te whārangi ipurangi a Ngā Taonga ngā kōrero o Te Reo Pāpāho e mau ana.