Kua haepapatia ngā mahi mōrikarika a ngā pirihimana ki a Lachan Kelly Tūmarae

Kua tata ki te toru tau te whānau o Lachan Kelly-Tūmarae e tatari ana kia puta te ripoata IPCA e mātai ana i te matenga o te tamaiti he tekau mā iwa noa iho ngā tau. I pūhia ia e te hunga pirihimana i Omahu, i Te Matau a Māui i te tau 2011.

Ko tā te ripoata e mea ana, kua haepapatia katoatia ngā mahi hē ā ngā pirihimana, ahakoa i pūhia te tamaiti kia tekau mā whā ngā wā.

I tae ā tinana atu te IPCA ki te kāinga ō Lachan Kelly-Tūmarae, hēoi, kāore ngā kōrero o roto i te ripoata i eke ki ngā tumanako ō te whānau.

I te tekau mā tahi o Poutūterangi, 2011, i te inu waipiro, momi tarutaru hoki a Lachan i te pō i mua mai. I te mau pū ia, kātahi ka tūpono ia e ngā pirihimana. Nā wai rā ka whāia a Lachan e rātau mō ngā kiromita tekau mā waru mai i Maraenui ki te urupā o Omahu.

I te wāhi i tū ai rātau, i aro te pū a Lachan ki te pirihimana, mea rawa ake ka pūhia a Lachan kia tekau mā whā ngā wā. E whā ngā kariri i titia ki roto i a ia. I mate a Lachan i te hohipera.

E ai ki te ripoata, kāre i hē ngā mahi a te pirihimana nāna a Lachan i puhi, inā hoki ko tōna oranga tērā i mōreatia.

Hēoi, he mana nui tō te ripoata nei, i te mea kei roto ko ngā kōrero katoa e pā ana ki ngā tini whakahaere a te pirihimana matua o taua pō. E mea ana te ripoata, kāore i tika tana mahere rautaki.

Kāore hoki rātau i whai whakaaro ki te haumarutanga o Lachan i te wā i whakatakotohia ngā taratara ki te hurahi.

Kāore anō kia tino tau te wairua o te whānau o Lachan i ngā kōrero kura puta i te ripoata.

Ahakoa ngā tini tūtohu kua whakaara ake e hāngai ana ki ngā kaupapa here a te pirihimana, otirā te mau tika i ngā pū, ka kore rawa e tau te noho a te whānau.