Kua hē te rēhita o ngā uri a Ngāti Rehua

E ai ki Electionz ira kati com, e hē ana te rēhitatanga o ngā uri a Ngāti Rehia, ā i hē hoki te pōtitanga whakamana i te kawenata whakataunga a Ngāti Rehua. He kitenga nui tēnei i te pūrongo nā Te Kōti Teiti i kōkiri, i te putanga o te tono a ngā uri i tēnei tau e whakahē ana i te ara i whāia e tō rātou poari ki te whakatutuki i te whakataunga.

Mai rā anō te āwangawanga a ngā uri mō te rēhita a tō rātou anō poari.  Nō te whakatewhatewhatanga mai kua kite he tika o rātou whakapae.

Hei tā Huhana Lyndon (Ngāti Rehua, Ngāti Wai ki Aotea), "Ko tētahi o ngā mea nui ki roto i te rīpoata me kii ki a mātou ngā kaikerēme, ā, kei te hē te rēhita o tō tātou hapū.  Nō reira kei hē rawa atu te rēhita o Te Poari o Ngāti Rehua Ngāti Wai ki Aotea."

E ai ki a Aperahama, i piki ake te tautohe a ngā uri whai pānga i ngā rā i mua tonu i te Kirihimete nō te hainatanga ohorere o te Minita Take Tiriti i te kirimana whakatatū o Ngāti Rehua.

Hei tā Aperahama Edwards (Ngāti Rehua), "Ki a mātou, ki tā mātou titiro koia ēnei ko ngā mahi e hua ana i te akiaki a te Minita a te Kāwana kia horo te whakatau i ngā kerēme a ngā hapū. ā, kua huri tuara mai te poari nei ki wā rātou uri, nā reira kua tahuri ki te mahi i ngā mahi kuhu e kitea nei."

"Ki roto i tōku ake whānau i rehita mātou i ngā rā o te Kirihimete, ā, mai i reira ka pōti ki roto i te hui whakatau mō ngā take kerēme engari ināianei kāhore mātou e rehita," hei tā Lyndon.

Nā te hapū tonu te poari i mau atu ki te aroaro o te Kōti Teitei i te marama o Maehe hei aukati i te whakatatūtanga mai o Ngāti Rehua.  Iaianei kua kitea e electionz.com ā rātou nā mahi kuhu.

Hei tā Edwards, "Ko te pūtake o te raruraru nei e anga mai ana i te minita e anga mai ana i te tari o te minita ara te tari whakatau kereme i Te Tiriti o Waitangi e tāwēwē mai ana ana karoti i mua i te kanohi o ngā hunga nei e whakakōtiti nei i te haere o tō mātou hapū." 

"Ināianei kua kite kahore e tika ngā mahi ki roto I te poari.  Nō reira me tū tika te hui a tau me pōti mō ētahi tarahiti hōu kia mahi tika o tātou tarahiti me te poari a ngā rā kei te tū mai nei," hei tā Lyndon.

Kei te tatari tonu a Te Kaea kia tuku kōrero mai Te Poari o Ngāti Rēhua-Ngāti Wai ki Aotea mō tēnei take.