Kua hinga te kapa Warriors ki ngā Falcons i te whakataetae rīki o Te Waiariki

Ki te rauna tuarima o te whakataetae rīki ā-rohe o Te Waiariki, i tūtaki ngā Forestland Falcons o Tokoroa ki ngā tauhou o te reanga tuatahi, ngā Warriors o Taneatua/Whakatāne i te papa whakamaumahara o Tokoroa.

Koinei te wā tuatahi kua tūtaki ēnei kapa ki a rāua anō.
Ko Forestland Falcons i te kahurangi me te pango, a runga i te whakataetae reanga tuatahi, ā, ko te kapa Tāneatua/ Whakatāne Warriors te tuarua. 
Heoi nā te iwi kāinga kē te ūnga tuatahi ki uta, he mea kīnaki ki te whana tuanuku.
Nō Forestland Falcons te whenua, engari i tae mai ngā kaitautoko a ngā Warriors o Taneatua/ Whakatāne ki te āki haere i ā rātou kaitākaro ki uta.  Kātahi anō tēnei tīma ka whakakao mai anō.

Hei tā Arthur Tonan, kāpene o Tāneatua-Whakatāne Warriors, "I tīmata ake tēnei kapa e rua tekau tau ki muri, ka whakamoea, nā, ka whakaarahia anō te kēmu rīki ki Tāneatua, i runga i te āki a ngā pākeke me te pai o ngā hua."

I te wāhanga tuarua ka whakatangatanga a Tokoroa kia ū ai rātou ki uta, kia kite mai ngā tauhou he aha rātou i amorangi ai.
I te mutunga iho kāre i eke a Tāneatua/ Whakatāne.

Hei tā Tonan anō, "I hara mai mātou ki konei me te mōhio anō ka uaua, ko rātou kei runga i te rārangi whakahaere e noho ana, kua whakaatu atu rātou ki a mātou na te aha i pērā ai, he mihi tēnei ki a rātou.  He mihi hoki tēnei ki ana kaitākaro i aro ki tēnei tūtakitanga."

Ko ngā tatauranga whakamutunga, rima tekau mā whā ki a Tokoroa, tekau mā rua ki ngā Warriors o Tāneatua-Whakatāne.