Kua hinga tētahi o ngā tino pouako matatau i te reo Māori, a Materoa Haenga

Photo credit/ Eastern Institute of Technology Hawke's Bay

Nōnapō ka hinga tētahi o ngā tino pouako matatau i te reo Māori me ōna tikanga, a Materoa Haenga.

He whitu tekau mā toru ōna tau ka ngaro nei. I te rangi nei ka poroporoakitia ia e Ngāti Kahungunu, te hapori kua roa nei e nōhia ana e ia.

He pou reo Māori, he pou whirinaki, he wahine humarie, he wahine koi. He wahine kua wheturangitia, e kore rawa e wareware.

E ai ki a Tātere MacLeod, “Ko Materoa Haenga he matatau ki ngā kīwaha, ki ngā āhuatanga katoa o te reo Māori. Inā te kōrero e kī ana ko te reo ōpaki, kei reira e mate ana te reo koira te moho o tēnei kuia.”

Kua tapaina ia hei mareikura o te manga Māori nā tōna matatau ki te ahurea Māori, he mātauranga i tuku iho ki āna tauira, kia āhei ai rātou te kōrero i te reo.

Ki tā Aroha Karaitiana, “He whaea tino ngākaunui nei ki a mātou nō Ngāti Kahungunu ahakoa nō Ngāti Porou ia.”

Hei tā Lee Kershaw, “He ngākau aroha, he ngākau katakata, ko āna tauira katoa, e tino aroha atu ana ki aia.”

Kua rima tekau ngā tau a ia e whāngai ana i te reo Māori, he rua tekau o aua tau e mahi ana ia i Te Aho a Māui.

E kaingākaunui ana aia kia whakaora tonu ai te reo, nā āna mahi i ngā kura reo maha me ngā waiata i titoa e ia.

E ai ki a Matiu Eru, “He nui ngā waiata kei konei nāna i tito nāna noa tētahi, ko te Te Ara o Tawhaki nāna me tana hoa i tito tērā waiata.”

Ki konei tiraha ana i Te Ara o Tāwhaki ki Te Aho a Māui mō ngā rā e rua, otirā, ka ahu atu ia ki tōna ūkaipo ki Turanganui a Kiwa, hei reira okioki ai ki te urupā o Taruheru.