Kua hoki mai Ngā Mamaku, Toa o te Ao Takiwhitu

James Perry

Nō te ata nei hoki mai ai ngā toa o te ao whutupōro takiwhitu wāhine, arā ngā Mamaku ki te kainga. I reira ō rātou whānau e rāhiri ana i ngā toa whakaihuwaka i te ata hāpara nei.

He rite tonu tō rātou hoki kiri reka mai ki te kainga. Nō tō rātou rirohanga i te mētara hiriwā i Ngā Taumāhekeheke o te Ao i te tau 2016, e hia kē nei ngā wikitōria kua riro i ā rātou i tēnei tau. Kua riro i ā rātou te mētara kōura i te Whakataetae Hoawhenua i Te Tai Kōura. Ko te whakataetae tuatahi o te World Series te rerekētanga i waenga i ā rātou me Ahitereiria, i tae tuarima rātou i taua whakataetae, heoi e toru ngā Whakataetae World Series atu i wikitōria e rātou kia tū tuarua mai rātou. Arā, nō ngā rangi nei kua hoki anō ki te pae o angitu i te whakataetae o te Āo i San Francisco.

He 28 wiktiōria karapīpiti te haere i tēnei wā o Ngā Mamaku, hei tā te kāpene, hei tā Sarah Goss ki a Newshub i te rangi nei, kua noho whānau nei te kapa, nā whai anō kāore tētahi e paku hiahia ana kia hinga te kapa, nā hoki atu hoki atu kua whakaihuwaka rātou.

Hei tā Tyla Nathan-Wong, kaitakaro o Ngā Mamaku, ka mau kē te wehi o te āheinga ō rātou te kī atu kua eke rawa rātou ki ngā pae ō angitū i te tau tonu nei.

I rāhiritia ai rātou e ō rātou whānau, e ō rātou hoa tata anō hoki ki te taunga rererangi i Tāmaki Makaurau. I ā ia e puta ana i ngā kuaha, i kite e Nathan-Wong i te poho-kereru o tōna tīpuna-koroua i tōna menemene. Mō Goss, e harikoa ana ia ka whai wāhi atu ia kia noho tahi ki tōna whānau kua roa e tautoko nei i a ia.

Ko ngā Black Ferns te kapa tuatahi, tāne mai, wāhine mai ki a wikitōria i ngā whakataetae ipu o te Ao takiwhitu karapīpiti, 24 haora i muri atu ka tāruatia tāua āhuatanga e te kapa tāne. Arā, kei ngā ringaringa ō Aotearoa ngā Ipu e whā pakeke o te Ao Whutupōro, hei tāpiri ki ngā Ipu o te Ao tekau mā rima ō Ngā Mamaku me te Kapa Ōpango. Hei tā Goss anō, he mea nui ki a Aotearoa ngā Ipu ō te Ao, he mea mīharo e pupuri nei i ngā mea katoa.

Kua whai wā whakatā, e ono wiki te roa te nuinga o te kapa, kātahi ka hoki atu ki te whakataetae Farah Palmer Cup, ka whakarite hoki mō te whatinga takiwhitu hou World Series. heoi, mō ētahi pēnei i ā Stacey Waaka, kua hoki tika atu ia ki te kapa tekau mā rima ka whakarite mō ngā whakamātautau ki a Ahitereiria hei te Here Turi Kōkā.

Ka whai wāhi anō ā Aotearoa ki tētahi wikitōria anō i te ao takiwhitu, ka whiti rere atu ai te kapa wāhine, tekau mā waru te pakeke ki Ngā Taumāhekeheke ō te Ao Rangatahi ki Āketina hei te Whiringa-ā-Nuku.