Kua kainga rua a Tahiti mō ngā kaihoe nō Aotearoa

Rahia Timutimu

Ko te wairua whakaihiihi, ko te wairua hīkaka kei Tahiti i tēnei wā, tokomaha ngā kaihoe nō Aotearoa kua tau atu, inā rā hei āpōpō whakarewa ai te whakataetae Waka Ama a Ao, ā tīmata ai ngā rēhi tuatahi o te whakataetae, ko te wāhanga pakipaki tērā. Ko ngā mahi i te rangi nei ko te whakaharatau whakamutunga mo ngā Kapa o te ao, ā, ko te nuinga o ngā kaihoe nō Aotearoa i ō rātou whare e whakarite ana mō ngā rēhi, i haere atu a Te Kaea ki tētahi wāhi noho mō ngā kapa nō Aotearoa, he rite tonu te wāhi rā ki tētahi marae.

Koinei te kainga hōu mō te nuinga o ngā kaihoe nō Aotearoa ki Tahiti.

“E noho ana mātou ki te taone college, e tata ki te 6 nga motu e noho ana ki konei, e noho ana ki konei i roto nei me nga tima e rima, ko nga j16 boys e rua, ko nga j16 girls kotahi me tetahi j19 boys ano hoki, he ahua orite ki te noho marae hoki, atu i enei moenga,” hei tā Hinerau Henare-Taiapa.

Tika ra he rite tonu ki te noho marae, ko Aotearoa tētahi o ngā whenua e ono kei te noho ki tēnei whakaruruhau, ā, kua rongo ai rātou i tēnei mea, i te whakawhanaungatanga.

Kua kaha ēnei pōai nō Otaki ki te whakaharatau mō tēnei whakataetae, ā, kua tae ki te wiki ka kitea ai mēnā ka whai hua aua whakahekenga werawera.

Hei tā Hiwa Baker O’Connor, “Mō te 10 marama pea i te timatanga o ngā whakataetae a rohe i whai haere o mātou mahi whakaharatau reihi ki Karapiro, i tino ū kaha mo tēnei whakataetae ki Tahiti, he āhutanga anō ki konei ki te pakanga ki ērā tima no iwi kē.”

E whakaae ana a Whatarangi Winiata, “He rereke tēnei wahi i Aotearoa, makariri ki Aotearoa he wera rawa atu tēnei wahi. He ataahua ngā moana, i te taha o te whenua, horokukū ana ki te hoki ki te kainga, he pai ki te noho mai ki konei.”

Hei tēnei Rāhoroi rēhi ai ēnei kaihoe whai muri i ngā rēhi pakipaki.