Kua karangahia he pakirēhua ā-kāwanatanga mō te pūtea kua riro i te rōpū tiaki pūtea o Tūwharetoa

He pakirehua ā-kāwanatanga te hiahia a tētahi mema pāremata ō-mua, mō te rima tekau miriona tāra kua riro i te rōpū tiaki putea whakatau o Tūwharetoa Settlement Trust.  Ko tā Georgina Beyer kātahi ko te maikinui ko tēnei, ā, kia uia rā ngā ringa nā rātou ngā moni i tuku, heoi kāore te minita Māori i te aro ake. 

Ehara i te pikitia ataahua, heoi kua karangahia he pakirēhua a kāwanatanga mō te ngaro pūtea, he rima tekau miriona tāra te wāriu.

E ai ki a Te Ururoa Flavell, "Kaore au e rata atu ki tērā whakaaro. Ko ngā moni a te iwi me waiho i roto i ngā ringaringa a te iwi, pai mai, kino mai."

Kua hoki ki te mahi, kaore te Minita Māori e kimi tautoko i ōna hoamahi i te whare mō tētahi pakirēhua.

Hei tā Flavell,"Kei wareware i a tātou ara noa ngā rōpū Pākehā hei pērā rawa te āhuatanga o te ngaro o te moni. Ko South Canterbury Finance tērā, ko BNZ, ko Fay Richwhite, i pērā rawa, he nui rawa atu te moni i whakapouhia rātou. Engari hoki mai ki a Tūwharetoa, e aroha atu ana i te mea ko te painga ake te tikanga ka haere ki ngā uri a Tūwharetoa."

Engari e putū ana ngā nama mō Tūwharetoa. Kua whakahē te rīpoata i ētahi o ngā haumitanga, he mea whakaae nā ngā kaitarahiti, ā ko ngā pūtea i haumitia ki te rōpū Tukia tētahi, me te hokotanga o ngā whenua ki Mangamawhitiwhiti tētahi atu.

E noho mū ana ngā wharemahi o te tarahiti o Tūwharetoa Settlement. Engari e ai ki te mema tōrangapū ō-mua, a Georgina Beyer, me huaki ngā tātau kia whai mohiotanga mō te take nei, ā mā te kōmiti take Māori pea te rongoā.

Kaore te tarahiti o Tūwharetoa Settlement i whakāe kia kōrero a kāmera mai ki a mātou, engari e mārama ana mātou o Te Kāea, nā runga i te whakatau a ngā kaitarahiti, kua kore rātou e whakaae ana kia patua ngā kaitarahiti o mua e te ture.