Kua kōrero a Garreth Morgan i ōna whakāro i te rangi tuatahi o te hui nui i Rātana

Kua tīmata ngā mahi whakanui i Rātana Pā i te rangi nei, i te hui tōpu ā-tau o te Hāhi Māori, he au kaha tōna i roto i te ao tōrangapū.

Ki te marae ātea i te rangi nei, whakaeke ai tētahi kanohi rongonui o te ao Pākehā, e waha ana i tōna kaupapa.  

He reka ngā kōrero a Gareth Morgan ki te marea i Ratana pā nei, engari tērā anō ngā kōrero kāore i whakapuakitia pēnei me tana hiahia kia whakakorea ngā tūru Māori i te whare pāremata.

Karekau he pēne, he tētere rānei, engari tūtūru e papaoa ana e Gareth Morgan wana whakaaro mō te Tiriti o Waitangi.

Ko te rangatiratanga o Ngāi Māori me te kuare o tauiwi ki te Tiriti tā Gareth Morgan i tana whaikōrero. Ā, he wero tāna ki te whare pāremata.

Āpōpō, hei ngā rā tatū nei ka puta mai anō te kōrero me he karoro, me he tui rānei.

Ka tika ehara i te mea e tautoko ana a Gareth Morgan i ngā āhuatanga Māori katoa.

Engari karekau aua take i whai wāhi ki tana whaikōrero.

Nōreira karekau a Gareth Morgan i te whakaae ki ngā turu Māori, engari anō te reo Māori, hei tana me mana ki ngā kura katoa.

Hei tā John Maihi, “Ko taku whakaaro kei te hē tēna i tū ake i mua i ahau, mātou, ki te kōrero mō tēnei whakaaro me tēnei kaupapa. Te pōhiri he mihi atu ki a tātou i runga i tēnei te karanga o te rā nei mō ngā mōrehu.”  

Tūturu ahakoa i reka ki ētahi ngā kōrero, e mōhio anō rā te iwi Māori kei runga te kōrero kei raro te rahurahu.

Hei āpōpō ko te rā nui ki Rātana Pā nei. Hei te ata pōhiritia ai a Kīngi Tūheitia me ētahi o tana kāhui Tekau Mā Rua. 

Whai muri mai ka pōhiritia ko te Rōpū Reipa me tana kaiārahi hou a Andrew Little, kātahi ko te tira Kāwanatanga, ā, ko te Pirimia Tuarua a Bill English rāua ko Te Ururoa Flavell e ārahi ana i a rātou.