Kua mauheretia tētahi tane whai muri i te matenga o tētahi tāne o Kawerau

E tangi ana te whānau o Barry Junior Hunt, toru tekau mā tahi te pakeke whai muri i tōna matenga nā tētahi raru i pupū ki Kawerau inapō, kua tau te hāmene o te kōhuru ki runga i tētahi, rua tekau ma rima noa iho te tau.  
 
Koinei te wāhi i tutu ai te puehu inanahi rā, i te otinga atu he mate te utu.
 
I tutū ai te puehu ki waenga i tētahi rōpū tāne, ko tā ngā pirihimana i mōhio rātou, ki a rātou anō.  Kua mauhere te tūngane o tērā kua mate, ā, ko te kōhuru te hāmene.
 
Toru tekau mā tahi te pakeke o Barry Junior Hunt i pā te mamae ki tana māhuna na te toki.  I haria ia ki te hōhipera o Whakatāne ka mate nei i ngā haora moata o tēnei ata.
 
Ki ngā pirihimana he kōhurutanga tēnei, ā, kua hāmene tana tūngane i runga i te kōhuru, rua tekau mā rima te pakeke o Cameron Hunt i tū ki mua i te aroaro o te kōti a rohe o Whakatāne i tēnei ahiahi.  
 
I tū te kōhurutanga ki tētahi wāhi haumaru, mō te hunga noho tata ki te whare i uiuitia rātou e ngā pirihimana, ka mutu i haere tonu a rātou kohikohinga ki tēnei wāhi i tū ai tēnei mahi.
 
I kōrero tahi au ki tētahi mema o te whānau pani, me tāna kei te ohorere, kei te tangi te whānau.  Engari he kōrero tēnei kua whakatumeke i te hapori me te mea nei kua riro ma te pukamata e whakamōhio ana ki te whānau whānui i tēnei tūmahi.  
 
Kua haria te tūpapaku ki Tāmaki Makaurau kia tirohia e te kaitiro tūpapaku, ko tā te whānau kāre rātou i te mōhio a hea ia ka hoki mai ki a rātou.
 
Kei mua i te aroaro o ngā kōti tēnei take, ā, kei raro i te ture a Cameron Hunt e noho ana, kia tū anō ia ki te kōti teitei o Tauranga hei te rua tekau mā rua o tēnei marama i runga i te kōhuru tangata.