Nō te rangi nei whakakao atu te whānau, ngā hoa piri tata, ngā hoa mahi ō-mua me ngā ākonga ō mua anō hoki o Ahorangi John Moorefield ki te marae o Te Kohinga Mārama i Te Whare Wānanga o Waikato ki te poroporoāki ki ā ia. Koina rā te wāhi i tū ai te kaiwhakatairanga i Te Reo Māori mō te rua tekau mā toru tau.
He kaiako Pākehā, he toa reo Māori a John Moorefield kua poroporoakitia e wana hoa haere me wana ākonga ōmua ki tētahi tangihanga Māori.
Hei tā Tākuta Tom Roa o Te Whare Wānanga o Waikato, “He whakanui i te nui o āna mahi mō te reo, tērā au i mea ai ko te ao e noho nama ana ki a ia. He pērā anō te āhua o te rangatira, mana atu mana mai.”
Ko Te Rita Papesch tērā i tae atu ki te tuku mihi ki tōna kaiako ō mua.
“He tangata tino humārie, kāre ia mō te whakaputa i a ia. Ko tāna aro i ngā wā katoa, kia mau pai i a mātau katoa te reo,” te kī a Papesch.
Nā Murumāra te kaupapa Te Tohu Paetahi i whakatū ki Te Whare Wānanga o Waikato, he tohu reo Māori. Nāna hoki i kaha whai kia hangaia mai he rauemi hou hei whakaako i te reo Māori. Hei tā Tame Roa, ahakoa ngaro atu i te kitenga kanohi, ka ora tonu wāna mahi.
“Ko te taonga nui ki au ko ana pukapuka, ko Te Whanake, Te Kākano, Te Mahuri, Te Pihinga, te Kōhuretanga, ērā pukapuka kei te whakamahia tonu hei whakaako i te reo,” te kī a Roa.
Ko tā Te Rita Papesch, “Haunga ngā pukapuka i tuhia e ia, ae nā mātau te kōrero heoi anō nāna i whakapukapuka, wērā atu o ngā taonga hangarau o te ao hou nei, nāna hoki ērā i raweke ki puta ai ki a tātau.”
Ināianei ka nehua ki te kōpu o te whenua, engari ia ngā kete mātauranga nāna tonu i raranga ka mahue mai hei taonga mā ngā reanga, haere ake nei.
