Kua puta ngā rārangi mō te Pō Tohu Tākaro Māori o Aotearoa

Nō te rā nei puta ai te rārangi īngoa tautapanga whānui mō te Pō Tohu Tākaro Māori o Aotearoa.

Kei tōna rua tekau mā rima tau ināianei, ka tū ki Tūrangawaewae Marae.  Me te aha - inā rā te taiea o ngā īngoa kua tonoa ki te whiwhi hōnore nui mō ā rātou mahi hākinakina i tēnei tau.

Hei tā Toiau mō Te Tohu Tākaro o Aotearoa Dick Garratt, he whakanui i ngā mahi hākinakina rongonui o te motu, o te ao hoki mō ngā tau 25 ki muri.

Nō te pikinga o tōna rongonui ki ngā whīra takiwhitu, ko Stacey Waaka tētahi kua whakaīngoatia mō Te Tamāhine a Papatūānuku, ko te taiea poitarawhiti a Maia Wilson anō tētahi.

Huri ana ki Te Tama a Ranginui nō te whānau Loane te māngari nui ko Akira me Rieko tahi e tirohia ana. Engari kei reira hoki a Ngāi Tūhoe Otere Black, me te tāroaroa Pango a Tai Wynyard, nōna i toa whakaihuwaka i tērā tau.

Kua whakaīngoatia anōtia a Lisa Carrington ki te rārangi tautapanga, ko Ngāpuhi Portia Woodman anō tētahi, kātahi anō ka wikitōria i te tohu takiwhitu wāhine o te ao i tērā wiki.

Kei te wāhanga o Te Tama a Tānenuiārangi te pakanga nui.  Tokorua ngā Ōpango Aaron Smith rāua ko Nehe Milner-Skudder, kua whai wāhi a Ngāi Tahu Trent Boult, a Jason Wynyard, me te poiwhana kāpene o te motu, a Winston Reid.

Hei tā ngā kaiwhakahaere ko te whakanui i te kounga hākinakina Māori - ahakoa he aha rawa rā te momo.

Hei te Rāhina rua tekau mā waru o ngā rā o Whiringa-a-Rangi tū ai te hui.