Kua puta ngā whakaaro ō te Minita ki ngā kitenga mō Te Pātaka Ōhanga

Mō te wā tuatahi ao ake i te whakapuakitanga o ngā kitenga whakatewhanga mō Te Pātaka Ōhanga, kua tuku uiui te Minita Take Matauranga a Hekia Parata.

Hei tāna ki Te Kāea, ahakoa kāore i kitea he takahitanga ā ture i te arotake a te Tari Hara Tāware, arā tonu ētahi wāhanga me mātua whakapakaritia - he āhuatanga i kitea hoki i te arotake a te Tari Tai Whenua.

Nā Hekia Parata te karanga i tuku ki te Tari Hara Tāware.

Ki tā te whakatewhanga karekau he takahitanga ā ture. E mea ana Te Poari Matua, me whakapāhā ka tika. Hei tā te Minita, ehara i a ia.

E ai ki tētahi tauāki a Te Poari Matua, karekau ināianei he take ki te whakatārewa i te kokenga o te kokoraho Tiriti a Te Kōhanga Reo.

Heoi, e ai ki te Minita i tēnei reta i tukuna e rāua ko Pita Sharples i ngā marama tata nei whakarārangitia ai te whakautu ki tēnā.

Me whakatikatika te kāwanatanga o ngā kōhanga reo i mua i te kōrero anō i raro i te Tiriti o Waitangi mō tētahi rua, toru marama pea tērā reta kei a rātou.

Kāti, hei te paunga o tēnei tau rā anō pea tutuki ai te hānganga hōu, nōreira ka noho tārewa tonu te kokoraho.

E ai ki te Minita, pena he whakatuaki te hiahia me titiro Te Poari ki a ia anō mōna i kore whakatau wawe i te raru i tērā tau.

Ko te aro nui ināianei ki ngā hui ā-rohe e whakahaeretia ana me te rōpū arotake i te hānganga hōu o te poari, me te wawata hei te otinga ake kitea ai te ara whakamua.