Kua rāhuitia a Whakaari

updated

E ai ki a ngā whakamārama ki Te Ao, kua rāhuitia a motu Whakaari. He karakia i whakahaeretia ki te puaha o Ohinemataora i te whā karaka i te ata nei. 

Inapō, nā te Kahika o Whakatāne te kōrero ka whakatuwherahia ngā kuaha o Mataatua wharenui i Te Mānuka Tūtahi Marae, otirā o te hapori whānui ki a rātou kua pākia e te hūnga ki Whakaari inanahi.

E ai ki ngā Pirihimana, kaare i kitea he tohu o te ora i te moutere, i ngā rerenga ki te moutere inapō.

Ko tōna 24 tāngata e ngaro tonu ana. Kua whakatauria, ko te tokorima i whakarauoratia i te moutere inanahi, kua mate.

Tekau mā waru ngā tāngata katoa i whakarauoratia i te moutere, te nuinga i pākia e te weranga kikino.

E ai ki ngā whakamārama, he tūruhi nō te kaipuke tipi haere Ovation of the Seas ētahi o te hunga e ngaro tonu ana.

He karere tīhau i puta i te Pirimia o Ahitereiria, i a Scott Morrison inapō e mea ana, e 24 ngā tāngata nō Ahitereiria i pākia e te parekura, engari ko te oranga o rātou kaare anō kia whakatauria. 

I tēnei ata, i tuku tautoko atu a Morrison ki te Pirimia, ki a Jacinda Ardern.

He kaipuke NZDF e noho tata atu ana ki te moutere, ka tuku matatopa ki te tirotiro haere i te moutere. 

Ka whakatū hui pāpāho te Pirimia hei te 7am ki te whakaputa i ngā whakamārama o te wā mō Whakaari.