E ārita ana te topatatahi o te kapa Chiefs, a Damian McKenzie kia hoki ki te whīra mō te whiringa whānui Super Rugby ki ngā Hurricanes.
Kāore ia i tākaro i te kēmu i tērā wiki nā runga i tētahi ture mō ngā Ōpango e kī ana me noho rātou ki te taha mō ngā kēmu e rua ia tau. Ahakoa kāore a McKenzie e rata ana ki te noho noa, hei tāna kua ora anō ia, e pakaru hoki ana ngā kerekere mō te kēmu e kainamu mai nei.
Ahakoa tāna noho ki te pae me te māuiui o Charlie Ngātai, i angitu tonu tōna kapa. Hei tā Colin Cooper, kaiako o ngā Chiefs, mā tāna hokinga mai e pakari anō ai te kapa, hei tāna anō, koia tētahi o ngā kaitakaro autaia rawa o te ao.
Ka porotau atu ngā Chiefs i ētahi o ngā kaitakaro hei te paunga o te whatinga nei pēnei i ā Ngatai me Liam Messam, arā he mea toitoi anō i te kapa mō ngā whiringa toa. Hei tā McKenzie, koira tētahi o ngā tino whāinga o te tau mō te kapa, kia piki anō i ngā taumata o angitu.
Hei te Pōmere nei, i Te Whanganui-a-Tara tuki anō ai ngā Chiefs ki ngā Hurricanes.
