Kua rite pai te kapa Rarauhe Tāroaroa Rangatahi ki te ahu atu ki te tauwhāinga FIBA Oceania

Rahia Timutimu
Tall Ferns prepare for upcoming world qualifiers

E noho puni ana te kapa Rarauhe Tāroaroa Rangatahi i tēnei wiki, ki te kaha whakangungu mō te tauwhāinga FIBA Oceania, kia whai urunga ai ki te whakataetae ā-ao, ka tīmata hei tērā Rāhina.  

Kua kotahi tau te kapa e piritahi ana, ā, hei tēnei Rāmere, tekau ngā kaitākaro ka tohua ki te kapa matua.

E rua ngā whakangungu i te rā mā ēnei taitamawāhine, he tūranga ki te kapa Junior Tall Ferns te whai.

Ahakoa he hoa rātou, katoa rātou e mōhio ana tekau noa iho ngā tūranga o te kapa ka kōwhiria hei tēnei Rāmere.

Kua whai a Te Kāea i tēnei kapa mai anō i tērā tau, i taua wā whā tekau ngā kōtiro i te hiahia tūranga ki te kapa, ināianei kua tae rātou ki te mutunga o ngā whakamātautau.

Nō ngā tōpito katoa o te motu, Ahitereiria me Amerika ngā kaitākaro nei.  Kei Amerika a Jessica Renata heoi e hīkaka ana ia ki te eke ki te kapa o Aotearoa.

Rere ai ngā kaitākaro tekau ki Whīti hei tēnei Rātapu ki te whakataetae i te tauwhāinga FIBA World Qualifying, ki te whai tūranga ki te whakataetae o te Ao ka tū ki Rūhia hei tērā tau.

Mō ētahi atu pārongo o te tīma, tirohia te paetukutuku NZ Basketball.