E ngā iwi o Te Tai Tokerau, maranga mai! Koinei te karanga a te hīkoi mai i Te Rerenga Wairua mō te raihana kua tukuna e te Kāwana mā te kamupene o Statoil e kōwiri hinu i te moana o te uru. I te rā nei e kite ana he whānui kē te tautoko mō tēnei kaupapa mai i ngā iwi o te motu.
He tohu o te wā ko te haerenga mai o ngā Pākehā me ngā Māori nō ngā hau e whā ki te tautoko i te karanga o tēnei hīkoi kia waihotia te papa moana.
Hei tā Raniera Poihipi (Te Whānau a Apanui), “Ta mātou kokiri i te rā nei ko te whakakotahitanga mai ki te whakawhanaunga ai i a mātou ki Te Tai Tokerau, arā tīmata mai tā mātou hīkoi i Ngāti Kuri ka heke mai ki Te Rarawa ka heke mai ki Ngāti Whātua e haere nei te tira nei kia eke ki runga o Tāmaki Makaurau.”
Hei tēnei raumati, tīmata ai ngā mahi whakapaku paoro a Statoil ki te papa moana i te uru e mōhio ai kei hea pū ngā hinu. Engari ko te mate kē, inā raru ngā kōwiringa i te moana hohonu, kahore he hokinga whakamuri.
Hei te poupoutanga o te rā āpōpō, wehe mai ai tēnei hīkoi i Britomart ki roto o Tāmaki Makaurau mō Skycity. Hei reira porotēhi ai ki te aroaro o ngā tinirau tāngata ki te hui hinu a te kamupene o Statoil.
Hei tā Raniera anō, “Tukuna atu a tātou taniwha hei kai atu hei whakapōrearea atu i a rātou kia kaua tēnei kaupapa e haere mai ki konei, ko a tātou pātaka kai ērā, ko a tātou mokopuna te papa.”
Hei tēnei ahiahi tau atu ai te hīkoi ki Hoani Waititi Marae i te uru o Tāmaki noho ai mō te pō kotahi.
