Kua taunga te reo Māori ki te whare paremata

Whatitiri Te Wake

I te horapatanga o te mate kowheori delta, ko te reo Māori a Tākuta Ashley Bloomfield ka rangona ki te pae korero ia te ahiahi.

I mihia a Bloomfield e te tokomaha i ngā pae papori, mō te whakatangata whenua i ētahi kupu ki aua hui pāpāhō rā, pēnei i ngā kupu whānau, motu, me Tāmaki makaurau.

Engari hei te toihau o te Manatū Hauora, ehara ia i te toa reo Māori, he kaihāpai kē.

"Ehara ahau i te toa mo te reo, ahakoa te pai o tērā. Ki a au nei, he maringa nui no tātou kia whakamahi i te reo i tenei whenua. Waihoki, e ngākau nui ana i te kaha whakamahinga o te reo ki Aotearoa nei, ia rā" te kii a Bloomfield

Kua hiki te whare paremata i tēnei wiki engari e ai ki te Pirimia tuarua, ki a Grant Robertson he wā motuhake tonu mō ngāi paremata ki te whakaū i te reo ki te whare paremata.

"Ka aroha ke hoki i te korenga o te whare paremata i te Wiki o Te Reo Māori i tenei tau. He wā pai tēnei mo mātou ngā kaitōrangapū ki whakamahi i te reo" te kii a Robertson

Ko te moemoeā pea o ērā kaikōkiri i te reo, rātou i whakatakoto i te petihana ki Paremata i te tau 1972, kia rangona whānuitia te reo ki ngā moka katoa, ki ngā wāhi katoa pērā i te whare miere.

Nō te rā nei whakanuia ai te 49 tau o te tuku i te pētihana reo Māori. Tōna rima tekau tāngata, kaiako, kaiwhakaawe, toa o te reo hoki i kawe atu te pētihana ki mua o te Paremata i te 14 o Hepetema. Nā wai, i hua mai ko te ako i te reo Māori i ētahi kura, ko te rā reo Māori, ko te wiki o te reo Māori hoki.

Taka rawa mai ki ēnei rā, he paremata hōu ka kite, kua whai kāinga hōu hoki te reo Māori ki te kauhanganui o te whare rūnanga i te tokomaha o Ngāi Māori i te whare.

O ngā mema paremata 120, 24 o rātou he Māori. Kua kore kite i te tokomaha pēnei i te rahi kua noho mai hei mema tōrangapū i te wā kotahi. Tuia ki o rātou pūkenga maha, ko te reo Māori hoki kua tōia mai.

Ā, ko Bloomfield tētahi o ngā āpiha kāwanatanga e piripono ana ki te tauira o te reo kia rere, o te reo kia kōrero.