Kua toa te uri o Tūhoe a Jordan Kahu me tana kapa Broncos te tukinga NRL 2016 tuatahi

Rahia Timutimu

Ko Jordan Kahu, he uri nō Tūhoe me Te Atiawa, te tuatahi ki te whai piro i te whakataetae NRL mo te tau 2016, me te turaki ia Parramatta Eels ki te kainga, he tekau mā whitu ngā tatau ki te whā ki Poihākena.

E toru ngā piro tā ngā Broncos ki tā Eels kotahi, ā, kāre i whakaae kia whai ngā Eels i tētahi kaute i te haurua tuarua, ko tā rātou, te whai noaiho i te kotahi piro i te meneti rua tekau mā rima o te tukinga.

Ki te haurua tuatahi whai ai ngā piro katoa e ngā kapa e rua, ko Anthony Milford i whakawhiti kia whai te piro tuarua nā tētahi paku kiki a Corey Oates, ā, ko te piro whakamutunga nā Oates anō i whai, nā tētahi pāhi nanakia a Alex Glenn.

Ko Clinton Gutherson te tangata i whai te piro anake mā Parramatta.

Hei te pō nei ko te tukinga tuarua, ki waenga i te kapa Sea Eagles me te kapa Bulldogs.