Kua puta ko wai mā kei te kapa wāhine whutupōro takiwhitu ka rere ki Kanata i tēnei wiki, kia tae ki te tuawha o ngā whakataetae whutupōro takiwhitu wāhine o te ao.
Kei Mauao rātou e whakarite ana, i reira ta mātou karere o Te Waiariki a Mere McLean.
Mokori ngā mihi ki a Gayle Broughton o Ngaruahine rāua ko Carla Hohepa o Waikato, Tainui.
Hei tā Carla Hohepa, “I te whara kē au i ērā o ngā tōnamana, nāreira e pai ana te hoki mai me te puta ki te taha o ngā wāhine.”
Ki tā Gayle Broughton, “Pai ana te hoki mai. I whara au i te whakataetae inātahitau, ā, kāhore i pai.”
Rāua tahi kei te whakakī i ngā whāwhārua o ētahi kua whara. Mō te kapa toa tekau mā rua ka rere ki Kanata hei tēnei Rātapu.
E toru ngā whakarereketanga nui nō te kapa i haere ki Atlanta i te marama kua huri.
Ka hoki mai a Carla Hohepa rāua ko Charlotte Scanlan ki ngā poumua, ā, mō ngā poumuri ko Gayle Broughton tērā ka hoki mai.
E ai ki a Hohepa, “Mā konei e tata ake ai ki ngā taumahekeheke Orimipia a tērā tau. Ko te ū ki te rautaki, ngā tikanga kia kitea ai ngā hua te whainga mā mātou.”
Ka timata te tuawhā o ngā whakataetae whutupōro wāhine takiwhitu o te ao hei tērā wiki. Ko te tukinga tuatahi mā Aotearoa ka tīmata hei te ono miniti hipa atu i te whitu karaka i te ata ki a Whīti.
