Kua toko te pātai i te Kōti Matua mēna rānei nō te Karauna ngā wai Māori

Ahakoa kīhai te whakataunga o Te Kōti Rangatira i whakaae ki te kerēme a Te Pouakani, kua puta kē tētahi atu whakatau i te Kōti, e tūwhera ai he tatau hou ki te Māori e kawe ana i ō rātou tono mana ki te wai. Ka mutu, kua toko ake te pātai i te Kōti, mena hoki ka riro i te Karauna te rangatiratanga o ngā awa.

Ko te taki a ngā hapū e whai pānga ana ki ngā whenua o Te Pouakani, kei ngā tahataha o te awa o Waikato, e pā ana ki te mana mō tētahi wahanga o te awa. Mena hoki ki te riro te rangatiratanga o te papa o te awa i te Karauna, arā tonu te utu me tuku atu ki te Māori.

Hei tā Tamati Cairns, “Kāhore i āta taka ki ngā tumanako o Pouakani, kia whakahokia mai te papa o tō mātou awa, engari ko ngā whakatau a te Kōti i horapa ki te Māori.”

Heoi anō, ko tā te Kōti, ehara te ture tuku iho i te ture matua o Aoteaora, ā, e tāria tonu te whakatau a te kōti nō wai te mana. Hei tā te māngai mō ngā kaikerēme o Te Pouakani, e tūwhera ana tēnei whakatau i ngā tatau ki te Māori, kia takahi rā i te ara hei whakahoki atu i te mana o ngā awa ki te Māori. 

E ai ki a Tamati Cairns, “Kua kore e taka atu ki te whakapono nō te Karauna te mana, a, kua āhua awangawanga te āhua nō te Māori, engari ko te whakatau a te kōti, me āta noho ngai tātou, ki te tuku whakaaro, mō ō tātou āhua e kī ana e tātou nō tātou.”

Hei tā te Roia mō te Kaunihera Māori ka whai kiko te whakataunga nei ki ā rātou kereme ki te wai, e tāria ana kia rongohia rā te wahanga tuarua o aua kereme e te Rōpu Whakamana i Te Tiriti o Waitangi.

Mea rawa ake, hei tā Donna Hall me he mea e whiriwhiri ana ngā iwi i tētahi whakataunga tiriti me te Karauna, me āta whakaaro rātou ki ō rātou mana wai, ā, ka pēhea hoki te noho o aua mana i roto i ngā kaupapa wai hou a te Kawanatanga.