Kua tū ngā pihi mō ngā utu a te Kaikomihana

Kei te takariri katoa ngā tumuaki Māori o tēnei rohe ki ngā whakamarama kua puta I raro I te Ture Pārongo e pa ana ki ngā utu ki tēnei komihana a Mike Eru.

Haunga anō ngā tumuaki Māori, kei te rikarika hoki te māngai mō ngā tumuaki katoa o te rohe ki te pūnaha e ahei ai ngā komihana te whakateitei i a rātou utu ki te kotahi rau tāra i te haora.

E whakapono ana a Pat Newman o te Kāhui Tumuaki Māori o te Tai Tokerau, kāore a Eru i te whai wā moe inā te nui o ngā haora kua tukuna e ia hei utunga mā te kura.

E tekau mā waru marama kua pahure no te urunga mai o Mike Eru hei komihana ki te kura o Moerewa nei. 

Taka mai ki te rā nei kei te noho muna tonu te kaupapa o tana haerenga mai, ā, kahore hoki he whakāturanga o ngā mahi kua tutuki engari he teitei rawa te nama ka mahue mai ma tēnei kura e whakaea.

Nō te Pepuere o tēnei tau ka puta he pūrongo ātaahua i te Tari Arotake Mātauranga mō ngā mahi i te kura Moerewa, nā reira i te pātai tonu ngā mātua he aha pū te tino kaupapa o te komihana.

He hiahia tō Esme Sherwin, kia kitea ake ngā tino mahi i oti i a Eru.

Hei tā Robert Clarke o te Kāhui Tumuaki Māori o te Tai Tokerau, “He nui rawa tēnei pūtea ko te tumanako ka heke iho tēnei pūtea mō ngā tāmariki kia taea ai rātou te ako i ngā āhuatanga o tēnei ao hurihuri ehara mō te tangata kotahi pukuriri rawa atu au ki tēnei whara.”

Kāore anō kia whakautua a mātou pātai e te tari o te Minita Mātauranga.