Kua tū ngā whakataetae kapa haka ā rohe o Tāmaki Makaurau ki Vector Arena

Taroi Black

Mo te wā tuatahi ka whakaatu ngā mahi a Tāne Rore me Hine Rēhia ki te whare tapere ā ao, ki Vector Arena.

I tēnei rangi i whakamātauria e ngā whakataetae a-rohe o Tāmaki Makaurau tēnei whare whakahirahira mo Te Matatini ka tū ki tēnei takiwā a te tau rua mano rua tekau mā

I tomo atu te hunga mātakitaki ki Vector Arena mo ngā whakataetae a-rohe o Tāmaki Makaurau i raro i tētahi wairua hou.

Ki tā tētahi o ngā kaitautoko ki tā Makaira Berry, “Inā te maha o te wā e haere ana ngā whānau ki te mātaki i ā rātou e kore e tāea te uru nā te iti o te wāhi. Nōreira koira tāku e hīkaka nei e tāea te tini me te mano te haere ki te tautoko i ngā rōpū.”

I pupū ake hoki te whakaaro mai ētahi o ngā kaihaka ko Vector Arena tētahi o ngā wāhi tika ki te whakatū i Te Matatini ruamano rua tekau ma tāhi. Tekau mā rua mano te hunga ka ahei ki roto o Vector.

E ai ki a Tapeta Wehi o Te Waka Huia, “Mēnā he whakataetae ki Tāmaki koinei te wāhi tika. I rongo hoki te korero koinei tā mātou wā tuatahi nōreira he wāhi pai tēnei.”

Kua puta ngā whakawhiti kōrero mo tētahi wāhi hei whakatū i Te Matatini ki Tāmaki. I te ekenga atu o Te Waka Huia ki te papa whakatutuwaewae, ka kitea ngā hua o tēnei wāhi whakahirahira.

Ki tā Tapeta Wehi, “Ka rongo i te wairua o tēnei whare, koinei te whare ki te whakahaere i ngā concerts o te ao. Nōreira tō mātou waimarie.”

Hei tā Ngarimu Blair o Ngāti Whātua, tēra pea ko Vector te turanga whakahaere i ngā momo huihuinga pēnei.

Hei tāna, “He wawata mo mātou o Ngati Whatua kia hoki mai ki Tāmaki Herenga waka ki konei pea ki konei pea ki Takapawhau rānei. E kohimuhimu ana te pā mo taua kaupapa ki te whakarite i tētahi rautaki kia riro ano i tēnei tino kaupapa.”

Tekau mā whitu ngā kapa e whakataetae ana mo ngā turanga e rima mo Te Matatini ki Ngāti Kahungunu a tēra tau.

Hei te pō nei ka mōhio ai te marea ko wai ngā rōpū ka tū ki runga I te ātāmira o Te Matatini hei te tau e tu mai nei.