Kua tūwhera ngā kāinga tekau mā tahi hōu ki Uku Tōia

E oati ana te Minita o Te Kaporeihana Whare a Bill English ki te whakaea i ngā hiahia o ngā kairēti i ngā whare kaporeihana.  I tūwhera i te rangi nei te tuatahi o āna kāinga hōu ki te takiwā o Uku Tōia, i Tāmaki Makaurau.

Ko tā Ruth Tongialele, he whāea ki ngā tamariki tokorima i noho ki tētahi kāinga hapori ō-mua, āe marika, he rawe tōna kāinga rua.

Hei tāna e tino aroha ana āna tamariki ki te whare, ā, i tau mai ko te wairua harikoa i tō rātou kuhutanga tuatahi atu.

Ko te taumarumaru hōu o te kainoho o Uku Tōia tētahi o ngā kāinga hapori tekau mā tahi kātahi anō ka whakatūwheratia e te Kaporeihana Whare o Aotearoa.

Hei tā te Tumu a Glen Sowry, ko tā te whanaketanga hōu he whakakore i te mahutatanga mai o ngā kōrerō kino e pā ana ki ngā kāinga kōpeke, mākū hoki.

Engari horekau kē te Minita Whare a Nick Smith e ngākautiti kaha pērā ana. 

Hei tā Smith arā tonu ngā taero a Kupe ka kitea nā te tokomaha o te hunga ka whai wāhi atu ki ngā ratonga hapori whare.

Ka mutu, hei tāna ko te wero he whakaiti iho i ērā tūāhuatanga mā te whakapiki ake i te kounga o ngā whare.

Ā te mutunga mai o Maehe ka riro te mana whakahaere o ngā kainga rua mano waru rau a te Kaporeihana Whare, me te nama rua rau miriona taara ki te whakaea i ngā tumanako kia whakatūngia mai anō kia whitu mano rima rau kāinga hōu, i a te Tāmaki Redevelopment Company.  

Hei tā te Minita Kaporeihana Whare a Bill English e aro atu ana tēnei kaupapa ki te hanganga mai o ngā kāinga marutau me te whai wāhinga o ngā ratonga o te hapori ki tēnā.