Kua tūwhera te taupuni puia hiko o Te Mihi Uenukukōpako

Nā te mahi tahi ki waenga i a Tūwheratoa me te kamupene Contact Energy te wawata me te whakatūwheratanga o te taupuni puia huri hiko o Te Mihi Uenukukōpako i taea ai i te rā nei. He tūāhuatanga ka noho hei tūāpapa i roto i ngā mahi ōhanga mō te puia, me te aha, ko te hua ki te Māori, he hua ki a Aotearoa whānui.  

He tari hiko pūia tēnei e whāngai ana i ngā kainga kotahi rau, ono tekau mano nuku atu. He whakahekenga iho a Te Mihi Uenukukopako nō te puna nui o Wairākei, ā, mō te tumu Māori o Contact a Whaimutu Dewes ka noho tēnei hei tauira mō te reanga e tū mai nei. 

Hei tā Whaimutu Dewes, “Me ako tātau i ēnei, me whai hoki ngā tamariki i ngā tapuwae kia tae mai rātou ki roto i te māpu nei ki te mahi, mā rātou tēnei mahi a rātou e whakahaere.” 

Nā Bill English i whakatūwhera i te tari nei, ahakoa kīhai te kāwanatanga i toha pūtea ki te kaupapa. 

Engari ko te mīharotanga o Te Mihi Uenukukōpako mā te hapū tonu a Ngāti Rangita o Oruanui o Tūwharetoa e tiaki i te mauri o te puna.

E ai ki a te uri o Ngāti Tūwharetoa, a Topia Rameka, “Mahi ana ngā tāngata o te hapū i te taha o tēnei kamupene, hei tiaki i o rātou taiao e pā ana ki te puna me ērā atu tūmomo mahi.”

Ka noho tēnei pou hei tohu i te kotahitanga ki waenganui i ngā hapū o tēnei wāhi me Contact, ka noho hoki hei tauira ki ngā whakatipuranga hōu e tū mai nei.