E huri ana ngā hau ki Te Tai Tokerau i te rā nei i te urunga mai o te kahurangi hōu mō Whangarei a Sheryl Mai me tana tuarua a Sharon Morgan.
Me te tumanako o ngā hapū, ki raro i ngā whakahaere a ēnei wāhine, ka mukua te tohu kaki whero kua roa e iri ana ki runga ake i tēnei kaunihera.
He tokowhitu ngā wāhine kua riro i a rātou te haurua o ngā tūru ki runga i te kaunihera-a-rohe ki raro i te kahurangi o Whangarei.
Hei tā Rihari Shepherd (Te Kahu o Torongare) ki a Te Kāea, “Na te kaha hoki o tēnei wahine te koromatua nei, ka haere mai ki te kōrero ki a mātou nei tōna hiahia me takoto hoki i te ao Māori i roto i āna nei mahi.
Ka whakaae hoki matou ngā hapū o konei kia hāere mai hoki mātou ki te tautoko hoki i tēnei wahine.”
Ahakoa te pāpouri mō te kore whai tūnga a te Māori kotahi ki te tēpu o te Kaunihera, kei te tūturu tonu ngā whakaaro.
Ko tā te mema pāremata o Reipa, tā Shane Jones, "Eke atu i te hia noa atu paiheneti he wahine tēna pea ko te kaupapa o te ūkaipō kei te wahine ka hono atu ki te kaupapa o te ūkaipō kei te tangata whenua he tohu ora pea mō Whangarei Terenga Paraoa."
Kua roa nei te tohu o tēnei kaunihera he kakī whero.
Engari mā roto i te urunga mai o ngā wāhine kātahi ka rata, ka māmā pea te tū a te kaunihera o Whangarei ki te iwi Māori.
Hei tā Shepherd anō, "E rua hoki ngā wahine nei e whakahoe ana hoki i tēnei waka e kore rātou e wareware e tū tonu mātou ngā kaumātua i tō rātou taha mā mātou hoki e wero ki a rātou me pēnei me pērā."
