Kua whakahokia te pou arataki hauora a Te Orohi Paul ki Te Teko

Kua hoki a Te Orohi Paul, pou arataki hauora ki tōna ūkaipō ki Te Teko whai muri i ngā rā e rua i takoto ia ki Taheke Marae, Okere.  Heoi, e ohorere tonu ana te iwi whai muri i tōna wehenga i tēnei wiki. 

Ko te mūrau a te tini, te wenerau a te mano tēnei te kawe i ngā roimata mō tētahi i arohanuitia mō āna mahi nui.

Hei tā Te Ururoa Flavell, “Kātahi te wahine nei, ara anō tōna momo, ringa raupā mo te iwi, inā kē te nui o ngā kaupapa i kawe e ia, ā iwi, ā Mārae, ā mātauranga, ā hauora, ā kēne, he aha rānei, ana, koia tērā te mea whakaae atu ki ngā kaupapa katoa.”

I whakaeke mai a Te Orohi Paul ki Uiraroa Marae i Te Teko i te ata nei, i Taheke Marae ki Okere ia e takoto ana i mua. Arā ōna pānga nui ki ngā ara motuhake hei whakaora i te hunga mate i te kai tarutaru, inu waipiro, otira i roto i ngā waka nui.

E ai ki a Te Poroa Malcolm, “Tēnei wahine, he wahine kaha ki te torotoro haere ki roto i ana iwi, ia Mātaatua, haunga Mātaatua, ara Te Arawa puta atu ki a Tainui.”

I tīrehe a Te Orohi i Te Whanganui a Tara i a ia e heke ana ki tētahi huinga Ripeka Mā i Te Waipounamu. Ko tana hoatata, ko Pem Bird tērā e ohorere tonu ana ki tōna hingatanga.

Ki tā Pem Bird, “Koira te pouri te mamae, i roto i tērā ahua, te rā mutu i puta mai tana hinanga ko tātau ērā, koia i hopukina ki tērā o ngā hui kua huri mai rā, ki te hui a tau o ngā kura a iwi, pakari ana otira te hinanga o te kuia rā.”

E rima tekau mā waru ōna tau ka ngaro nei, ka mahue mai ko tōna hoa rangatira a Hakopa me ā rāua tamariki, mokopuna. Ka nehua ki Te Teko hei tēnei Rātapu.