Kua whakahouhia te waka hourua o Te Matau a Māui

Ko te waka hourua o Te Matau a Maui tērā kua hikina ake i ngā wai a Tangaroa, kia āhei ai ōna nei kaitiaki ki te whakatika, ki te whakapaipai hoki i tōna ahua.

Kua roa te waka nei e tere ana i ngā moana o Te Whanga Nui a Orotu, me te aha kua pau i a ia te whā mano maero moana neke atu. Ka mutu, kaare he wā tua atu i tēnei ki te whakapaipai anö i a ia.

Ko tino mahi a te Waka Hourua "Te Matau a Maui" i roto i ngā tau ki muri, he kawe tūruhi, he kawe tauira, he tohutohu, he whakamārama i te tini me te mano, ki ngā āhuatanga katoa e pā ana ki te whakatere waka, ki ngā piki me ngā heke a Tangaroa.

Heoi no tenei wiki, ka hikina ake te Waka nei ki uta, kia timata ngā mahi whakapaipai.

E ai ki ngā kaitiaki o te waka nei, he maha ngā kaupapa nui ka tautokohia e "Te Matau a Maui" hei ngā marama e heke mai nei, na reira tūturu ka taikaha ratou ki te whakareri ia mo aua take.

Otira, ka haere tonu ngā mahi whakatikatika mo ngā rā tekau e tū mai nei, me te tumanako ano, ka kitea tenei waka e tere ana i ngā Moana o te ao, ki Hawaiki Nui, Hawaiki Roa, Hawaiki Pāmamao.