Kua whakaingoatia te kāhui ka arotake i te hoki mētara kore a ngā Rarauhe Hiriwa i te Taumāhekeheke Hoawhenua i te marama kua hōri.
I hoki kiri haunga mai ngā rarauhe hiriwa i ngā taumāhekeheke hoawhenua. Nō te rangi nei whakaingoatia ai te kāhui arotake i aha i pērā ai.
Ka noho te roia nei a Don Mackinnon hei kai arahi mō te kāhui nei. Ko tētahi atu ko Kevin Shoebridge. He kaiwhakaere waka i toa i te Ipu o Āmerika i te tau 2017. Ka mutu, koia hoki tētahi o ngā kaiwhakahaere o Team New Zealand. Nānā hoki ētahi o ngā arotake ō rātou i roto i ngā tau. He wheakoranga ka hāpai rawa i te arotake nei.
Ko te tuatoru ko te Rarauhe Hiriwa o mua, ko Linda Vagana. Hei tā MacKinnon, nā te mōhio pū o Vagana ki ngā piki me ngā heke o te ao poitarawhiti i tīpakohia i a ia.
E rua nga wahanga o te arotake ka tirohia e te kāhui nei. Ko te wahanga tuatahi ka tiro ki ngā āhuatanga i te Taumāhekeheke Hoawhenua. Ko te wahanga tuarua ka tiro whānui ake ki ā Poitarawhiti Aotearoa. Mai i te Poari Whakahaere, ki ngā kaimahi, ki ngā kaiako, kaitākaro tae rawa tonu ki te whakataetae ANZ Premiership.
Hei tā Poitarawhiti Aotearoa, ka hoki te tirohanga o te arotake nei ki te tau 2016, ā mohoa nei.
E matapae ana e McKinnon hei te marama o Pipiri mutu ai te wahanga tuatahi o te arotake. Hei te peka tītoki mutu ai te toenga o te arotake.
