Kua whakamānutia te kaupapa whakawhanake i te ohanga Māori e Reipa

Labour leader David Cunliffe visit Te Tai Tokerau

I te Tai Tokerau te kaiārahi o te Rōpū Reipa a David Cunliffe i tēnei rā ki te whakamānu i āna kaupapa hei whakawhanake i te ohanga Māori, me te aha, kua kite ake kahore hoki i tū atu i te mahi ngātahi ki ngā rohe kāinga hei whakatutuki.

Inā tū ko te Rōpū Reipa hei kāwanatanga aini ake nei, ko te mahi tahi ki ngā whānau, ngā hapū me ngā iwi hei whakawhanake i ngā rohe kāinga te karanga.

Hei tā Willow Jean Prime, "He mea nui te mahi tahi, kaua e noho i roto i Pōneke me te whakaaro me pēnei, me pērā, engari me haere mai ki te kōrero ki a mātou i roto i te Tai Tokerau e pā ana ki te huarahi kei mua i te aroaro."

I tēnei wā tonu neke atu i te tekau mā waru paihēneti o te hunga kaimahi Māori o te Tai Tokerau kei te noho koremahi.

Hei tā Kelvin Davis, "Kia whakamānutia ngā kaupapa here e pā ana ki te iwi Māori.  E tika ana ngā kōrero o Hohepa kia whakamānuhia ēnei kaupapa ki roto i te whare tūpuna, ki runga i te marae i runga i tō mātou whakaaro, e ngākaunui ana te Rōpū Reipa ki ngā tikanga Māori."

Kua tata kore kē he kaupapa kei raro i tēnei rohe nā reira kei te whakaae te Rōpū Reipa mā te whakangao me te mahi tahi ki ngā iwi kua tatū kē o rātou kerēme tiriti e ea ai ngā tūmanako me ngā wawata mō te oranga ki tua o ngā whānau me ngā hapū kei ngā rohe kāinga.

He take ēnei ka kōrerotia whānuitia i a te kōwhiringa pōti e kainamu mai nei.