Kua whakamīhia a Tariana Turia mō āna mahi ihu oneone i te Whare Paremata

Kua tohua a Tariana Turia hei Kahurangi o te New Zealand Order of Merit i te rārangi hōnore tau hou a te Kuini mō āna mahi ihu oneone i te Whare Paremata.

I kuhu tuatahi a Turia ki te Whare Paremata i te tau 1996 hei mema paremata mō te pāti Reipa, kātahi ka tutuki i a ia te tūru o Te Tai Hauāuru i te tau 2002. Ka haere te wā ka tū ia hei kaiārahi takirua o te pāi Māori.

I mōhiotia whānuitia ia i Aotearoa i te wā i tū koaro ia ki te pāti Reipa nā ngā take e hāngai ana ki te pire takutai moana.

Nā tēnei i pupū ake ai te hīkoi o ngāi manomano ki Paremata i te tuarima o Haratua i te tau 2004. I whakapuakihia e rātau tō rātau kore aro ki te kaupapa o te pire i taua wā.

Kua tekau mā waru tau a Tūria i te ana o te raiona, ā, anō nei ko ia te rōhi ki waenganui tātaramoa. Ko ia hoki tētahi o ngā mema pāremata koi rawa.

Nā tōna māia ki te kōrero ki a Helen Clark me te Kāwanatanga o taua wā mō ngā take e pā ana ki te takutai moana i para i te huarahi kia tū te pāti Māori. Nā konā ka puea mai he tū he kaupapa Māori motuhake.

Tekau mā rua tau ia i tū ki te pāti Māoeri, ā, i roto i taua wā, i whiua ki a ia ngā kupu whakatakē mō tana mahi tahi ki te pāti Nāhinara. Nā tēnei i pupū ake te tohe ki waenganui i a rāua ko te mema o te Tai Tokerau a Hone Harawira, kātahi ka māwehe te tautoko ki te pātu.

I tērā tau, i whāki mai ia ki tā mātau karere take tōrangapū, ki a Maiki Sherman, ko te wero nui ki a ia, kaua ko te taha tōrangapu, engari ko tētahi atu take e noho piritata ki a ia.

"Ko te wero nui mōku, ko te puta ki waho atu i te Paremata, karekau taku reo Māori. Koirā tētahi o ngā tino mate i pā ki a au"

Whai muri i tana whakatārewa i a ia anō i te Paremata i tērā tau, i hoki atu a ia ki tana hoa rangatira kua rima tekau mā tahi tau rāua e piritahi ana, ki a rātau tamariki, mokopuna hoki.

Nō ngā iwi o Ngāti Apa, Ngā Wairiki, Ngā Rauru, Tūwharetoa me Whanganui a Turia.

I mua i tana wehenga atu, i noho tahi ia ki te kōrero ki tā mātau karere, ki a Maiki Sherman mō tana wā i Paremata, otirā ōna maharatanga nōna e tū ana hei mema pāremata.