Inā ngā tini koirīringa mō ngā take kei te Poari Matua o Te Kōhanga Reo, na whai ano te ahua rangirua o Te Ururoa Flavell.
I hui ai te Pāti Māori me ētahi mema o te poari matua ina tahi rā, ā hei tana ko te orangatonutanga o te poari tētahi o ngā take i korerotia.
No runga i ngā ahuatanga o te ture, kei te tohea te whakatau pana i a Druis Barrett mai i Te Pātaka Ōhanga.
E ai ki ngā whakamara he whiu i ūhia ki a ia na tana whakahē i tētahi whakāetanga whakawatea turanga mahi e whakaritea tonutia ana i waenga i a Lynda Tawhiwhirangi me te Poari Matua.
Hei tā Te Ururoa Flavell, “Kaore tera i puta, kaore mātou i patai mō tena take, i tona mutunga mai e mohio ana matou ko ngā take o te poari ma rātou ano ra tena e kōrero.”
Kua tae kē ake te purongo otīta ki te poari matua hei tirohanga ma rātou, ina whakahokia ki te umanga otīta ka tukuna ki te manatū me ngā minita.
I kōrero a Te Kāea ki a Hekia Parata i tēnei wiki mō te takaroa o te whakapuakanga mai.
Hei tā Hekia Parata, “Tuatahi ka tono atu tēra ki te kohanga mehemea kei te pirangi whakatikatika i ētahi kōrero i roto i tera, hei te wa ka oti tera ripoata ka tuku atu ki au kei te tatari tonu au ki tera.”
Kei te takiwā o te wha rau mano tāra te whika e korerotia ana i waenga i te Poari Matua me Lynda Tawhiwhirangi, otira, hei tā Shane Jones taihoa aua kōrero ka puta kia tau noa ngā whakapae raweke pūtea mo Lynda Tawhiwhirangi i tana turanga toihau o mua mo Te Pātaka Ōhanga.
“Maku e titiro pai kē atu me kaua tētahi kapa kotahi e whakawhiwhi atu kia pau ngā arotake kia tuturu ai pena e whai niho ana enei whakapae.”
Mō te roanga o tēnei wiki kua tono uiui a Te Kāea me ngā heamana takirua o te Poari Matua o Te Kohanga Reo engari auare ake.
Heoi, hei te paunga o tenei marama e whakaponotia ana ka puta te pūrongo otīta a te Manatu Matauranga, ā, hei reira pea ka rongo tatou i a rātou kōrero.
