Kua oti ngā rauna whakawai o te whakataetae Super Rugby, me te aha, kua kite i ngā kapa ka tuki i ngā whiringa whānui hei te wiki e tū mai nei. Ko te kapa Blues te kapa anake o Aotearoa kāore i eke ki ngā whiringa whānui.
Kua whakamoe te whatinga kōtonga o ngā Blues i nā pō rā, i patua kinotia rātou e ngā Crusaders 54-17 i Ōtautahi. Hei tā te kāpene o nga Crusaders, hei tā Sam Whitelock, ahakoa he mea harikoa i angitū rātou, e āwangawanga ana ia mō ngā āhuatanga paku ngoikore ana rātou i ētahi wāhanga o te kēmu.
Inā te roa e noho ngā Crusaders ki te tūranga tuatahi o te whakataetae. Nā kua riro i ā rātou te mana whakauhi i ngā whiringa whānui e kainamu mai nei, timata ana ki ngā Sharks o Āwherika hei te wiki nei.
I wehe a Keiran Read me Ryan Crotty i te papa tākaro, he wharanga te take. E whanga ana a Scott Robertson, kaiako o ngā Crusaders mō ngā kōrero o ngā tākuta, hēoi e whakapono ana kei ā ia ngā kaitakaro hei whakakapi i ngā whāwhārua. Ko te mea nui ki ā ia, kua eke anō rātou ki ngā whiringa toa, te wāhi taurīkura o ngā Crusaders.
Kua oti anō ngā takaro o te ika-ā-Whiro, o Jerome Kaino i te tukinga ināpō rā. Hei ngā wiki tata nei ka wehe atu ia me tāna whānau ki Toulouse i Wīwī takaro ai. Hei tāna, kua rata ia ki tāna noho i Aotearoa, hēoi hei ā kō ake nei ia tuku roimata ai.
Ko te tuarua o ngā whiringa whānui he tāruatanga o te tukinga i te Pōmere. I puta te ihu o ngā Chiefs, 28-24 ki ngā Hurricanes i Kirikiriroa. I mua te haere o ngā Chiefs 21-0 i te weheruatanga. He āhuatanga me tere whakatika e ai ki te kāpene ki a Brodie Retallick. I ngā wiki e toru kua pāhure, kua pahū ngā Chiefs i ngā wehenga tuatahi, hēoi kua āhei ngā hoariri kia hoki mai i te wehenga tuarua.
Ka tutaki anō rāua ki te Whanganui-a-Tara hei tērā wiki. He hiahia nō te kāpene o ngā Hurricanes, nō Beauden Barrett kia kapi katoa ngā turu o te Tīni Keke e ō rātou apataki.
Ki te wikitōria ngā Crusaders ki ngā Sharks, ka heke te toa o te tukinga Hurricanes/Chiefs ki Ōtautahi tuki atu ki ngā toa whakaihuwaka o tērā tau.
Ko ngā Highlanders te toenga o ngā kapa Aotearoa e ora tonu ana. I te whakarite rātou mō te hīkoi roa ki Āwherika tuki atu ki ngā Lions. Hēoi nā te hingatanga o ngā Waratahs ki ngā Brumbies, me te wikitōria o ngā Lions ki ngā Bulls, i peke ngā Lions i ngā Waratahs i te tēpu, nā kei Poihākena noa te hikoi mā ngā Highlanders. Hēoi, ki te eke ngā Lions ki ngā Jaguares o Āketina, me whitirere atu ngā Waratahs, Highlanders rānei ki Johannesburg. Mānohi anō, ki te angitū ngā Jaguares, me heke rātou ki Poihākena, ki Otepoti rānei.
