Kua whakatakoto wero a Kingi Taurua ki mua i te Kāwana Tianara

Ko Titewhai Harawira tērā i arahi i atu a Kāwana Tianara Jerry Mateparae me Ngā Tauā Moana o Aotearoa ki runga i Te Tii Marae i te rangi.  Ā, ko ngā toenga whakataunga kereme te kaupapa matua i rere haere ki Waitangi.

Rere ana te karanga ki te Kāwana Tianara.  Ā, ko ana kaitautoko tērā i whakahoki i te karanga.

I kōrero a Kāwana Tianara Jerry Mateparae i tana hiahia kia oti wawe ngā whakataunga kereme, me ngā āwangawanga o tana tūranga hei māngai mō te Kuini, hei Māori hoki.  Heoi kāore tonu ētahi i rata.

E ai ki a Taurua, “Noho mai koe hei matua mō mātou, hei kōrero ki te Kuini o Ingarangi, koia tērā te Kāwana Tianara.  Ko tērā taku tangi atu ki roto i te whare rā, "E te Kāwana Tianara noho mai koe hei papa mō mātou."  Koia ēnei ngā kōrero o o mātou mātua tīpuna i ngā wā o te Tiriti o Waitangi.”

“Ko taku hiahia ki taea ai ia kite whakautu i taku pātai, taku hiahia.  Koia te māngai i waenganui i a ahau me te kuini o Ingarangi, horekau i waenganui i te kuini o Ingarangi me te Kāwanatanga, nei kei te hē tērā.  Horekau tērā i roto i te kōrero o te Tiriti. Ngā kupu o te Tiriti kua rongo koe kei waenganui nui i a tāua te Māori me te kuini o Ingarangi, noho mai koe i waeanganui i a mātou.

“Kīhae ia i whakautu, kīhae i tatari atu kia whakautua mai i taku pātai.  Nō reira, āwangawanga ana au, i runga i ōna whakaaro tēnā pea koia kē te kaiwhakamana i ngā ture o te kāwanatanga.”

I haere te Kāwana Tianara ki te whare mīhana o Māngūngu i Hokianga, he wāhi i haina ai te Tiriti.