Kua whakatūturu te Pirimia i te tukuna o ngā hoia o Aotearoa ki Iraq

Ka tau i te Pirimia, i a John Key i te rā nei, he neke atu i te kotahi rau ngā kai-mahi o Te Ope Kātua ka tukua ki Iraq ki te whakangungu i ngā ope tūtei o reira.

I taupatupatuhia te take nei i te whare i te rā nei.

Kāre e kore he wairua whakahē mō te whakaputanga i kite i te whare nei.  Ko John Key me tōnā Kāwanatanga anake e whakāe ana ki tēnei whakatau, ā e noho manakore ana ngā kaitōrangapū o te āpitihana.

E ai ki a rātou kua tuohu a John Key ki ngā hiahia a Amerika me Ingarangi.

E oho ana ngā hau e whā i enei pikitia, e whakaoho ano hoki i a John Key ki ngā mahi. Ā, e hia kē ngā kaiwhakahē i te whare.

Mō tēnei hoia o mua i Vietnam kāre he oranga mō te Māori ki ngā pakanga o te Āo.

Hei tā Kingi Taurua, “Mehemea Māori, me noho ki te kainga, tuku atu ngā hoia Pākeha mā mō te mana motuhake o tētahi atu iwi ki tēnā pito o te ao, kahore au e whakae.”

E whakapono ana te pirimia, he mahi ārahi noa iho tā ngā kaimahi o Aotearoa i ngā rōpū whakamaru i Iraq. Engari e ai ki ētahi, he tūpono i te tangata.

Ki tā Taurua, “Pōrangi mātou ki te haere pērā. Ko tōku mahi inaianei e tohutohu ana ki ngā hoia Māori inaianei, kaua e haere ki te pakanga mō tētahi atu motu me noho ki te kainga ki te pakanga mō tēnei motu.”

Hei te marama o Haratua wehe atu te rōpū tuatahi ki te nohonga o Taji i Iraq, ā hei ngā marama e iwi kei te heke, ka arotake ngā mahi.