Kua whakawehea ai te whakataetae o Ngā Manu Kōrero ā-rohe o Tāmaki, kia rua ngā rohe

He whakataetae whaikōrero-ā-rohe kua nunui atu i te whakataetae-ā-motu.

Koia nei te take i whakawehea ai te whakataetae o Ngā Manu Kōrero ā-rohe o Tāmaki, kia rua ngā rohe, arā ki Raki me te Tonga.

Neke atu i te whitu tekau ngā kaiwhakataetae Manu Kōrero ā Rohe o Tāmaki i tū i roto i ngā rā e rua i tērā tau, heoi mō ngā whakataetae o tenei tau 2015, kua rerekē ngā whakahaere.

Hei tā te kaiwhakahaere, a Harley Maika, “I ngā tau kua pahure tokowhā anake ka haere atu i roto i te whakataetae o ngā kaikōrero ahua ono tekau, nō reira he nui atu tera whakataetae ki tō te whakataetae-a-motu. Nā reira i toko te whakāro me whai wāhi atu ētahi atu anō, nō reira ko te rongoa mō tērā ko te wāwāhi i te rohe kia whai wāhi ai te tokowhā mai tetahi rohe, te toko whā mai i tēnei.”

Ko te whakataetae mō te rohe o te Tonga kua tapaina nei Te Whaitua o Uenuku, ka tū mō te kotahi rā anake, hei te marama e heke mai nei.

Ki tā Maika, “Kua roa mātou e wānanga ana ki te Manawhenua o konei, nō rātou te whakamārama mai kia mātou ko Uenuku te tīpuna nāna te rohe nei i ngā rā o mua, nō reira kua whakahokia te mana ki aia me te whakaīngoa ano i te rohe i roto i tōna āhua, ko Uenuku tērā.”

Ahakoa ka wehe ngā whakataetae mō te rohe o Tāmaki, ko te whainga matua kia kake tonu ngā pukenga o ngā kaikōrero, reo Pākehā, reo Māori hoki ki ngā taumata o ngā tau ki mua.

E ai ki a Maika, “Ko te tūmanako ka tū pakari katoa ngā kaikōrero, me te mea hoki ka whakarangatirahia tō tātou reo, me te whakatenatena hoki i ngā kaikōrero reo Pākehā, e tū pakari ai rātou i runga i te aroha me te rangimarie. Ko te tūmanako hoki ka haere atu mātou ki ngā whakataetae-ā-motu i runga i te kaha me te maia.”

Otirā hei te otinga o ngā whakataetae Manu Kōrero a rohe o Tamaki ki te Raki me Tāmaki ki te Tonga, ka kitea ai mēnā i ea ngā moemoeā o te wehenga nei.