Kua whiwhi te kura o Te Kapehu Whetu i te tuatahi a o rātou pūrongo whakawā

Te Kāpehu Whetū receive first ERO report

He kura e kaha whai ana i te ara e angitū ai te hunga rangatahi Māori.  Koinei tētahi o ngā kitenga nui a Te Tari Arotake Mātauranga ki roto i tana pūrongo tuatahi mo te kura hourua o Whangarei a "Te Kapehu Whetu", ara tētahi o ngā kura hourua tuatahi o te motu kia tūwhera ōna tatau i te timatanga o tēnei tau. 

E tekau marama kua pahure no te tūwheratanga mai o ōna tatau engari ehara i te mea kei te ohorere ngā kaiwhakahaere o Te Kapehu Whetu ki ngā hua o te pūrongo a Te Tari Arotake Mātauranga.

E ai ki te Tumuaki a Dr Nathan Matthews, “Hei te rangi nei kua oti ngā whakamātautau a NCEA i ngā akonga nāreira he mahi pai tērā he mahi nui nāreira ae kua tau ngā akonga kua tau pai rātou ki roto i te kaupapa nei.”

I roto i tana pūrongo ka kitea e Te Tari Arotake Mātauranga e ruarua noa iho ngā wāhanga hei tirohanga, hei whakatikatanga mā tēnei kura.

E ai ki a Matthews, “E pai ana te hanga o te kura e pai ana te haere o te kura e pai ana noho a ngā akonga ki roto i te kura koira te mea nui kia mātou.”

Kei te pūtake o tēnei kura ko te whakapakaritanga o te iwi Māori mo te kotahi rau tau e haere mai nei. 

Ā, kua tū kē ōna puna kohungahunga e whā ki tēnei takiwā me te whakaaetanga a te kāwana kia tūwhera tana kura teina ā tērā tau.

Hei tā Matthews, “Ā, kātahi ka taea te noho mō te katoa o tō rātou haerenga ki roto i te kura nei mai i te timatanga tae noa atu ki a rātou wehenga atu ki te whare wānanga ki te aha ki te aha.”

Hei te tauhou tūwhera ai te kura teina o Te Kapehu Whetu ki Whangarei.