Kua wikitōria karapīpiti te kapa AB i ngā taitara Takiwhitu

Kua wikitoria te kapa Ōpango Takiwhitu i ngā taitara e rua karapīpiti, whai muri i tā rātou angitū ki Ahitereiria i te whiringa toa o te whakataetae takiwhitu, ki Poihākena. A, ko ngā tungāne Ioane anō ērā i tū rangatira, kia eke panuku a Aotearoa i ngā hekona whakamutunga.

Haruru ana te whakaminenga whai muri i te piro o Rieko Ioane kia eke panuku rātou.

I ngā meneti e rua whakamutunga kei muri a Aotearoa mā ngā māka e whitu engari i whai a Rieko i ngā piro e rua kia wikitoria anō te taitara.

I te timatanga o te tukinga ko Ahitereiria te kapa makau, ko rātou te hau kāinga, ā, i kitea hoki te kounga o tā rātou ārai ahakoa ngā kokiringa o Aotearoa.

Kāhore e roa ka whai hua hoki te hau kāinga,  nā rātou te piro tuatahi.

I hono atu ngā tūngāne Ioane kia taurite ai te tatauranga.

I whai piro anō ngā kapa e rua kia oti te haurua tuatahi tekau mā rua ki te tekau mā rua.

I te haurua tuarua, i eke te kounga o Ahitereiria, i whai piro i te tuatahi.  Otira i ngā meneti e toru whakamutunga i arahi te tukinga rua tekau mā wha ki te tekau mā whitu.

Heoi pērā ki tōnā tuakana a Akira i tērā wiki i Te Whanganui a Tara, i tū ake a Rieko kia whai i ngā piro e rua.

Ka hoki mai ngā tūngāne Ioane ki Aotearoa inaianei rātou ko Ardie Savea kia hono atu ki o rātou kapa Super 15 engari ka haere te toenga o te kapa ki Amerika mō te whakataetae ki Las Vegas.