Mā te taenga atu o Te Matatini, ka hāpai i te ōhanga o Kahungunu

I ngā tau, e hia miriona tāra kua whāngai ki ngā ōhanga o to motu nā te ahurei kapa haka nui rawa o te ao, ara Te Matatini.

Hei te tau rua mano mā whitu, e tonohia ana e Ngāti Kahungunu ki ngā ūmanga whai rawa nō Āhia me ngā moutere ki Te Matatini kia whakawhanake i ngā mahi tauhokohoko i taua rohe.

Hei ngā tau e rua ka hāutehia e Ngāti Kahungunu ngā kapa haka taiea o te ao me ō rātou kaitaunaki toru tekau mano te nui.

E ai ki a Ngahiwi Tomoana, “E hiahia ana mātou ki te whakakaha i ngā hononga o tā te Māori i ngā pakihi o kōnei me te motu whānui me o mātou hoa pakihi ki a Ahitereiria ki Ahia ki te Moana nui a Kiwa.”

E tutuki ai tērā, kua tono atu a Ngāti Kahungunu ki ngā pakihi whai rawa nō Āhia me ngā moutere kia para huarahi pakihi ai i ngā rāngai maha mai i te ahumoana tae noa atu ki te hangarau.

Ki tā Tomoana, “Kia haramai kia noho kanohi mai kia kōrero mō te ara whakamua mō tā te Māori mō tā te Hainamana tā te Vietnamese hoki kia hīkoi haere tahi.”

Ko te ao o Te Matatini he mea whai rawa mā ngā ōhanga o te motu.

I te tau rua mano tekau mā tahi i Tūranga Nui a Kiwa, he tekau mā rua miriona taara

I Te Arawa, i piki ake taua nama ki te tekau mā whitu miriona te rahi.

I tērā tau, i te rohe o Ngāi Tahu, he rua tekau mā whā miriona i whāngai atu ki tā rātou ōhanga.

Hei tā Tomoana, “E hiahia ana mātou mō rātou ki te haramai kia whakanuia Te Matatini ki a mātou nei, mai te ara tikanga ka tūī ai te ara ohanga hei oranga mō tātou.”

E tūmanako ana te iwi kia whai painga ai te katoa mā te toru tekau miriona tāra ka tau atu ki te ōhanga o Te Matau a Māui.