Mā te whakatō taura matihiko e whakapakari ai te Tai Tokerau

He taonga hōu e hua mai ai tētahi oranga ki tua mō te rohe o Te Tai Tokerau.

Koinei te ia o ngā kōrero mō te taenga mai o tētahi taura e kawe nei i ngā matihiko nō ngā tōpito o te ao ki tēnei whenua.  

Ka tau ki uta o Whangarei he taura e kawe ana i te huhua o ngā raraunga matihiko.

Hei tā George Riley, “He whakaaturanga tēnei ki ngā iwi puta noa i te motu ki te ao hurihuiri katoa ko tātou o Te Hiku o te ika o Te Tai Tokerau kei a mātou ngā rauemi me ngā ringaringa kaha kia mahi ai ngā pakihi.”

E wha rau miriona taara te wāriu o te taura o Hawaiki kei te tautokona e te kamupene o Sinclair Investment Group kia mau mai ki Aotearoa.

Whai muri i te taura o Southern Cross koinei te tuarua o ngā taura kia tae mai ki tēnei pito o te ao.  Anō he tino pakiaka hei whakararata mai i ngā kamupene haungarau ki Aotearoa me Te Tai Tokerau.

Ki ngā matapae, hei te tau rua mano tekau mā whitu tīmata ai ngā mahi a tēnei taonga.