He whakairo mō Hinenuitepō tērā kua karakiangia, ā, kua tuwhera ā-ōkawa atu ki te tini ngerongero i te papa whakairo o Les Lapidiales i Wiwī.
He mea whao nā Paora Toiterangiuaia, he uri nō Ngāti Porou, nō Airani hoki, te whakairo, tekau mita te roa, e rima mita te whānui, nōna e noho wānanga ana ki Wiwī. I oti i ngā nohonga e rua, i roto i ngā tau e ono.
He ope ono tekau tāngata te nui i whakakanohi rā i Aotearoa i tae ake, ko ētahi nō roto i te whānau tonu o Toiterangiuaia, nō Waipiro i Te Tai Rāwhiti, ko ētahi nō Ngāti Rānana, ā, ko ētahi nō te karapu Wiwī o Waiheke, kei reira rā a Toiterangiuaia e noho ana. Tata ki te rua rau ngā Wiwī i tae ake ki te karakia whakatuwhera i te atatū, i reira rā whakamārama atu ai te ringa toi i ngā kōrero mō Hinenuitepō, ā, he aha hoki ia i kōwhiri ai i taua kaitiaki hei mea whakarei i te ana e iri rā ngā whakairo a Toiterangiuaia.
