Kei te whai tohu mātauranga tētahi tokotoru nō Ngāpuhi i te Whare Wānanga o Wikitoria, hei kapo i ngā pūkenga, kia hiki ai rātou i te ōhanga Māori, kaupare hoki i te rawakore i Te Taitokerau. No te rā nei i kōrero a Eru, Hemi ratou ko Tipene Kapa-Kingi ki a Te Kaea i te Huinga Tauira i tū ki Te Whanganui a Tara.
“Ko etahi o oku wawata ko te hanga pakihi ko te whakapakari i te ohanga maori ki te taitokerau,” hei tā Tipene Kapa-King te tauira I roto I ngā mahi pākihi.
“I te wā ka noho matou i te kainga o te taitokerau ka kite ngā maha o ngā Māori e whakaki i ngā hohipera koinei ka haere mai ki konei ki te whakaako ki te ako ano ki te awhi i o matou Māori,” hei tā Hemi Kapa-Kingi he tauira I roto I ngā mahi ture me te reo Māori.
“Ki ta matou ko wēnei ngā tohu pai hei whakaora hei whakahapai i tatou te iwi Māori,” hei tā Eru Kapa-Kingi he tauira I roto I ngā mahi hangarau me te reo Māori.
I whānau mai rātou i Rotorua engari i hūnuku ki Te Taitokerau mo te kohanga reo, kura kaupapa hoki a Toku Mapihi Maurea. Nā wai ra ka huri rātou ki te mātauranga auraki ki Whangarei.
Hei tā Tipene Kapa-King, “Mai i ta matou whanau mai ka piri tata matou i nga wa katoa hei pou tautoko tetahi ki tetahi.”
I tae atu rātou ki te pōhiri o Te Huinga Tauira i Te Herenga Waka marae i Te Whanganui a Tara i te rā nei. E toru rau neke atu ngā tauira i rūmene atu ki te kaupapa hei poipoi i te tuakiri ahurea me te tiki atu i ngā ratonga tautoko i waho i te whare wānanga.
Hei te tau e tū mai nei ka whiwhi te tokotoru i a rātou tohu.
