‘Me mutu te kī atu, he kaihara ā tātou rangatahi’- te kī a tētahi kaimanaaki rangatahi

Nā Te Kakenga Bishara, pia o Te Rito. 


Kei te hē kē atu te mahi hara a ngā rangatahi, he tuki waka ki ngā toa hokohoko, he whawhai, he tāhae waka, he whānako rawa hoki te mahi huri noa i te motu. 

Kei ngā rīpoata a Ngā Pirihimana o Aotearoa e whakaatu mai ana, kua piki ake ngā mahi tuki waka ki ngā toa hokohoko mā te 400% i ngā tau e rima, ā, e 76 ōrau o rātou i mau, he tamariki iho i te 18 tau te pakeke.

Ko te pātai ia, he aha rā kei te pūtake o tēnei raru, ā, me pēhea e whakatikahia ai tēnei mate i Aotearoa nei?

E ai ki a Jacqui Harema (Ngāpuhi, Ngāti Hāmoa), kaimanaaki rangatahi i Te Whānau o Waipareira, he maha ngā take e tahuri atu ana te rangatahi ki te mahi hara.

Hei tā Harema, ko te pōkaikaha, ko te mate hinengaro, ko te te kōrero whakaiti ki ēnei rangatahi te take e anga atu ai rātou ki te whai i ngā mahi hara. 

"Nā te tamōnga o ō rātou mātua, ka mate ēnei tamariki ki te tiaki i ā rātou teina. Koia anō tētahi o ngā take e whakaaro nei ngā rangatahi ki te mahi hē."

Nā Harema anō te kī, "tātou te Māori, me mutu te tapa i ā tātou tamariki ki te karangatanga kaihara, kairiri, aha atu, aha atu."

"Ko tētehi o ngā kaupapa hou a Te Whānau o Waipareira ko te “Youngatira”. Ko tana kaupapa, kia ū tonu ki ā tātou rangatahi, he awhi i a rātou ki te ara whakatika i ā rātou hapa. Ko te tūmanako, ko te hiahia hoki, kia riro mā tēnei kaupapa ngā rangatahi e āki kia tutuki i a rātou ngā hua o te pito mata."