Me tohe te kaupapa TPPA ki runga marae te kii a Harawira

E ai ki te mema pāremata ō-mua ki Te Tai Tokerau, ki a Hone Harawira, me huaki te waharoa o te marae o Te Tī Waitangi ki te Pirimia me tōna kāwanatanga, kia āhei ai ngā iwi o te raki ki te tautohe i te TPPA i tō rātou tūrangawaewae ake.

He tangata kōrero hāngai a Hone Harawira.  

Hei tāna ko te marae te wāhi tika mo tautohe, "Ehara i te mea ka tautoko engari kia kaua e mataku kia huakina ngā tatau, kia uru mai."

He kanohi kitea a Hone ki Te Tii, e wero ana a Harawira i te whakatau kia aukati te kāwanatanga ki te eke ki runga i te marae ki te tautoko rātou i te TPPA.

"Mēnā e hiahia ana koe kia rongohia i te tangata tukuna mai kia haere mai kia kite ai kanohi ki te kanohi ki a ia ki te whakatakoto i to taki kia mōhio ki ou whakaaro," hei tā Harawira.

E whakapaetia ana a Harawira ka tae mai te Pirimia a John Key ki Waitangi a muri i te hainatanga o te TPP, heoi mēnā ka pōwhiritia ki runga i Te Tii, kāore ia e mōhio mēnā ka ārahi anō tōna māmā a Titewhai Harawira i te Pirimia.

"Kua kuia haere taku whaea i tēnei wā engari kei reira tonu ōna whakaaro kia kaua e kapi i te kuaha te kēti kia whakapuare kia uru mai," hei tāna.

Nā reira ka noho tonu te mahi pupuri ringa a Key ki te whānau Harawira?

"Te mau ringaringa a te Pirimia?  Mēnā kia pana atu ia i te piriti, āe.  Mō te haerenga mai ki runga i marae, kao, ka waiho ki tētahi atu," tana whakahau.

Hei ngā wiki e toru ka mōhiotia mēnā rānei ka eke a John Key me ōna hoa ki runga i Te Tii.