Kua rere ake te whakatītina a te māreikura o Ngāti Whātua, pou ārahi tikanga anō hoki a Kahurangi Naida Glavish kia kaha ake te whakawhirinaki atu a te Kāwanatanga ki ngā iwi kia whai huarahi whakaauraki i ngā mauhere Māori.
E whai ana tēnei i te whakatuwheratanga ake o te whaitua hōu ki Pāremoremo, he toru rau miriona tāra te utu.
Ko tā Kahurangi Naida Glavish me nui te tautoko kia kore ai ngā mauhere Māori e hoki atu ki te whati i te ture.
“E kore oti i a rātou anahe te hakatikatika ai i tēnā āhuatanga, engari mēnā e mahi ngātahi ana ki te whānau, te hapū me te iwi ka kitea he huarahi puta,” i mea atu ia.
“Inā waihoatia atu ki a rātou e nahenahe anō, ka whai mahi tonu rātou i wēnā āhuatanga.”
E rua rau e ono tekau ngā mauhere kino rawa te hara ka noho ki te wāhanga hōu e mau nei i te taurahere ā hiko. He wāhanga toka i te ora hōki mō te hunga e noho wairangi ana.
“Korekau kē wēnā tū whaiāhua tangata e hoki mai ana ki te whānau ki te hapū, ki te iwi, tēnā koa kia mahi tahi ai tātou. Ko tō tātou tumanako o te whatumanawa kia puta ai i waho o te whare nei, kia kaua anō e hoki mai. Engari inā puta, e hoki mai ana ki roto i a koutou. Ea korekau kē hoki mai ana ki roto i a mātou.”
He huhua ngā momo kaupapa whakaoranga, whakaako hoki e wātea ana ki ngā tāne, whērā i te ahumahi hono, rorohiko, pānui me te kaute.
Wheoi, hei tā Glavish ka kore ngā mauhere e whai hua mā ngēnei anake.
“Korekau kē he take tua atu i te whai mahi ai ngā kaimahi o te wāhi rā. Pēhea taea e tātou te mahitahi kia kaua anō e hoki mai ki roto ki ngā whare pēnei.”
Ko tā Glavish me whakangungu te kāwanatanga i ngā iwi ki te āwhina i ngā tāne kia tau pai ai tā rātou hokinga atu ki waenga i te hapori.
