Koinei te korero o te Komihana a Larry Forbes i te rā nei mō te hiahia a Stephen Hovell kia hoki ia ki te mahi. E whā marama kua pahure nō te mutunga o Hovell i tōna mahi me tana noho wahangū mō te raweketanga o ngā tamariki e te kaiako James Parker.
Ko tā te Komihana, mēna e hiahia ana a Hovell te hoki ki te mahi ki te kura o Pamapuria, ko te tikanga me whakapono mārika atu ia ka taea e Hovell te whakahaere tika i te kura.
E whā marama kua pahure ināianei nō te hāmenetanga o tana tuarua a James Parker mō te raweke i ngā tamariki o Pamapuria. Mai i taua wā kua noho wahangū a Hovell i roto i ngā tirohanga ki taua take. E mea ana te Komihana, me whakautua e ia ētahi tino pātai kua puea ake i tō rātou ripoata mō nga mahi whakahaere i te kura.Ko tā te Komihana ano mā te whakautu i taua pātai ka mōhio pū ngā kaiarotake mena kei taua tangata te mana ki te kawe tonu i taua tūranga whakahirahira.
I tū atu i nga whakāetanga o James Parker ki ngā tini hāmene nāna nei ngā tamariki i raweke, kāre ano te tumuaki, tētahi atu o te poari rānei i whakāe noa i hē rātou, i takaware rānei rātou i roto i ngā whakahaere ki te whai i ngā take i mau kia rātou e pā ana ki te haumaru o ngā tamariki o tenei kura.
Nō reira he mahi nui kei mua i te aroaro o Hovell ki te whakautu tika i aua pātai, na konā whakaritea ai te Komihana mena ka tāea tonu ia te pupuri i te tūranga tumuaki o Pamapuria. I te mutunga ake ahakoa ko tehea te whakaritenga kua tūreiti ki tā ētahi nā te mea ko ngā tamariki kua tukinohia e taua tangata e kore e taea te hoki kōmuri.
