E kainamu mai ana te kēmu whakamutunga mā Liam Messam mo te kapa Chiefs. Hei te mutunga o te whakataetae Super Rugby, ka wehe atu ai ia ki Toulon i Wīwī.
Kua timata a Liam Messam ki te kaute i ngā rangi e toe ana ki a ia i roto o Waikato, hei tāna ko tōna whā tekau noa iho, ka mutu e whakapeto ngoi tonu ana ia ki angitu anō ai tāna kapa.
E whakaae ana a Colin Cooper, kaiako o te kapa Chiefs ki tērā, hei tāna, e rongo ana a Messam i ngā āhuatanga, ā kua kite e ia i ngā mahi ō Messam e eke anō ai rātou ki te whiringa toa hei te Here Turi Kōka.
Hei te mutunga o te whakataetae Super Rugby, timata ai a Messam i tētahi kirimana ki a Toulon, ki Wīwī. Ahakoa e hīkaka ana ia mō te haere e āwangawanga hoki ana ia mō ngā āhuatanga hou ka pā ki tōna whānau. Hei tāna, mā te aha i te whutupōro, me ngā pou whutupōro māna, hēoi, he ao hou anō mō āna tamariki.
40 āna takaro mō te Kapa Ōpango, hēoi ko tētahi o āna tino hiaihia kia takaro tahi me tōna karapu, me Marist St Michaels i Rotorua, i tūtuki e ia i ngā wiki tata nei. Hei tāna, ēhara i te mea ko te whutupōro noa iho te take, engari he whakahoki anō ki tāna hāpori. Nōna e tamariki ana me uaua ka kite i ētahi iho pūmanawa i ngā papatakaro whutupōro, ko tāna e wawata nei kua poipoi ngā Chiefs ō āpōpō i a ia.
Ko Messam pea te kaitakaro matua e whakatinana ana i tēnei mea, i te Chiefs Mana. Hei tā Cooper anō, inā kē te mana o Messam i roto i te kapa. Nāna ngā kaitakaro i ārahi i ngā wiki tata nei, nō ngā Ōpango e takaro ana.
E toru noa ngā kēmu e toa ana mō ngā Chiefs i mua i ngā whiringa whānui.
Timata ai ngā rangi whakamutunga mā Messam ki Fiji hei te Rāhoroi nei, i tā rātou tukinga ki ngā Highlanders.
