Kua whakahokia anō ngā taonga e rua ki te kāpata mō tētahi tau.
Kua pupuri anō Ngā Mamaku i te tonga whakamaumahara ki a Laurie O'Reilly, ā kua kapo anō te Kapa Ōpango i te kapu Bledisloe whai muri i ngā wikitōria ki Te Anawai ināpō.
Kua tekau mā rima tau te Ipu Bledisloe e noho ana ki tēnei taha o te Tāhimana. Nā te wikitōria 40-12 ki ngā Warapī ka noho tonu ki Aotearoa.
E whā ngā piro i riro i te topatahi i a Beauden Barrett, he rikoata mō te Kapa Ōpango ki ngā Warapī. He whakangū i ōna whakahāwea e mea ana me whakaheke e ia i tōna tūranga mō Richie Mo'unga.
Hei tā te kaiako Ōpango, hei tā Steve Hansen, e kite ana ia i te pitomata o Mo'unga, heoi he marara hoki te kite o te wheakoranga o Barrett.
Mō te kēmu tuarua karapipiti i wepua ngā Warapī e ngā Ōpango. He pai ake te tākaro o te Kapa Ōpango i tēnei wiki. Hei tā Kieran Read, kāpene Ōpango, i pai ake tōna tima ki te tiaki te pōro i Te Anawai, i āhei ai ngā poumuri kia rere.
Hei tā Hansen anō, e harikoa ana ia ki tōna kapa i haukerekeretia anōtia te hoariri i ā rātou.
Nā wai i pango, kātahi ka pango kē atu te pō mō Ahitereiria. I kapo anō e Ngā Mamaku i te ipu Laurie O'Reilly, he kapu kāore anō ngā Wallaroos kia pupuri.
Hēoi hei tā te kāpene o Ngā Mamaku, tāria te wā. Kua kite e ia i te pikinga kōunga o ngā Wallaroos i roto i ngā tau. Ka mutu, e whakaawe tonu nei ngā tamahine o Ahitereiria i ā rātou.
E whitu ngā piro i riro ki Ngā Mamaku ināpo, i tō rātou wikitōria 47-12. He kaha tonu nō ngā poumua kia whakawhiti i te rarangi piro. Ahakoa kāore a Fa'amausili i whakawhiti ināpō hei tāpiri ki ōna piro e toru i Poihākena, i whakawhiti ōna hoa poumua e rua. Hui katoa, o ngā piro 12 o Ngā Mamaku i ngā kēmu e rua, e 6 i riro ki ngā poumua.
Ka hoki inaianei Ngā Mamaku ki ō rātou kapa Farah Palmer Cup ka tīmata hei te wiki nei. Hei te otinga o te tau whitirere atu Ngā Mamaku ki Āmerika me Wīwī.
Ka whakarite te Kapa Ōpango mō ngā tukinga ki a Āketina me Āwherika ki te Tonga hei ngā wiki tata nei i te whakataetae Rugby Championship.
