Moths, Science and Te Kura Kaupapa o Ōtepoti

Kua whai wāhi Te Kura Kaupapa Māori o Ōtepoti i roto i te mahi a tētahi kaipūtaiao Pākehā e rangahau ana i ngā momo pūrerehu taketake. Kua tau te whakaaro Māori ki roto i a Tākuta Barbara Anderson mō ana mahi, waihoki kua akiaki te aronga me te mōhiotanga o ngā tauira i roto i te pūtaiao.

Kāre tātau e whai whakaaro ana ki te pūrerehu rere pō, mataora rangitahi. Ēngari he mea ahurei ēnei mea. Ko te pepetuna te mea nui katoa, e tekau mā rima henimita te hōrapa o ōna parirau. He maha hoki ngā tae parirau a te pūrerehu ēngari ka māwhe i te ao. Nei rā ētahi āhuatanga kāore e mōhiotia whānuitia ahakoa kei ngā wāhi katoa ngā pūrerehu taketake.           

Ko tā Takuta Barbara Anderson, “There's 2000 species in New Zealand and most of them - so more than 80% - are endemic to New Zealand and of those 2000 species only about 1700 are actually properly described and named.”            

Ko te pūrerehu taketake te whakamaimoa o tēnei tohunga pūtaiao. Hei tana, ko te pūrerehu me ngā whē ngā tino kai mā te aitanga a Tāne, nā whai anō tōna hiranga i roto i te pūnaha hauropi.          

Hei tā Anderson, “I want to get more data because I think it's a fantastic way to look at our ecosystem and answer some really cool science questions.”   

Hei whakatutuki i ōna hiahia i tīmatahia e ia te kaupapa ako mō ngā pūrerehu taketake i te kura kaupapa Māori o Ōtepoti, kia ngākaunui ai ngā tamariki ki ngā mahi pūtaiao, kia nui ai ngā kōrero mō te pūrerehu. Ko te tari Māori, pūtaiao hoki o te whare wānanga o Ōtākou ngā kaitautoko.       

Ko tā Tiahuia Kawe-Small, "E pai ana ki te hono ki a rātau me ā rātau pukenga ki te whakaako i ngā tamariki. Ka mauria mai e rātou tō rātau ao pūtaiao."             

Kua tākohatia ngā taputapu pūtaiao, ā, i riro tētahi whakawhiwhinga pūtea hei hoko i ngā karu whakarahi e toru.   

hei tā Kawe-Small, “I a rātau e rangahau, e kimikimi i ngā aitanga pēpeke, ka mauria mai ki te akomanga ka āta titiro ki te āhuatanga o ērā momo. Nā, he huarahi anō tēnā.”

Kua whai mātauranga hoki a Barbara mō ngā whakaaro noa o te tamaiti Māori e pa ana ki tōna ao.

“And having to translate some of those ideas into te reo was very good for me in clarifying my thinking,” tā Anderson.             

Hei tā Kawe-Small, “I ngana ia ki te kimi i ngā kupu Māori e hāngai ana ki tana kaupapa pepetuna. I puta mai ia ki te kura i kaha whakahua ia i ērā kupu kia whakamana i ngā mahi a ngā tamariki.”

Ka mutu ko te tūmanako ia, kia aro tonu ngā tamariki ki ngā tikanga pūtaiao, me he pūrerehu e whai ana i te muramura.